काठमाडौँ,फाल्गुन ४

काठमाडौँको भृकुटीमण्डपमा ;अर्को विश्व सम्भव छ’ भन्ने नारासहित विश्व सामाजिक मञ्चको सम्मेलन हिजोबाट  सुरू भएको छ । भृकुटीमण्डपमा सुरू भएको सम्मेलनमा सहभागी हुन १ हजार २५२ वटा संस्थाहरू दर्ता भएका छन् । नेपालमा पहिलो पटक भएको सम्मेलनको १६ औं संस्करणमा विश्वभरका ९२ देशबाट ४० हजार बढीको सहभागिता रहेको जनाएको छ l 

सम्मेलनमा विभिन्न १३ वटा विषयगत विधामा आधारित भएर ४०२ वटा कार्यक्रमहरू दर्ता भएको आयोजक विश्व सामाजिक मञ्च नेपालले जनाएको छ । विश्वका सीमान्तकृत समुदाय र वर्गको आवाज उठाइने सम्मेलनमा विद्यमान विश्व व्यवस्थाले अङ्गीकार गरेका नीति र संरचनाद्वारा सिर्जित नकारात्मक असर बारे पनि आलोचनात्मक बहस गरिनेकुरा सम्मेलनका मिडिया परिचालन उपसमितिका संयोजकसुशील वीकेले जानकारी गराएका छन् l 

नवउदारवाद, भूमण्डलीकृत पूँजीवाद, जलवायु संकट, पितृसत्ता, जातजाति, छुवाछूत तथा रंगभेद, नश्लभेद, लैंगिकता तथा यौनिकताका आधारमा हुने हिंसा, विभेद, द्वेषका विरूद्धमा एकजुट भएर गरिने विश्वभरका सामाजिक आन्दोलन र नागरिक संगठनको सामूहिक शक्तिलाई एकत्रित गर्दै परिचालन गर्ने काम विश्व सामाजिक मञ्चले गर्दै आएको छ ।

फाल्गुन ३ गतेबाट सुरू भएको सम्मेलन  फागुन ७ गतेसम्म चल्नेछ ।

विश्व सामाजिक मञ्च ल्याटिन अमेरिकाबाट सुरु भएको सामाजिक फोरम हो । विश्व सामाजिक मञ्चको वेबसाइटमा उल्लेख भए अनुसार पहिलो विश्व सामाजिक फोरम ल्याटिन अमेरिकाको पोर्टो एलेग्रेबाट सुरु भए यसको औपचारिक रुपमा मञ्चको आयोजना भने सन् २००१ मा ब्राजिलको सहरमा भएको थियो ।

त्यसयता भारत, सेनेगल, ट्युनिसिया लगायतका बिभिन्न देश हुँदै यसपटक १६ औं संस्करणको आयोजना नेपालमा भैरहेको छ l 

‘विश्व सामाजिक मञ्च’ को कार्यक्रमका लागि रत्न राज्यलक्ष्मी क्याम्पस (आरआर क्याम्पस) मा तीन दिन पढाइ नहुने भएको छ ।

सहायक क्याम्पस प्रमुख रामबहादुर कार्कीले बिहीबार सूचना निकालेर यही फागुन ४, ५ र ६ गते क्याम्पस परिसरमा मञ्चको कार्यक्रम हुने जानकारी दिएका छन् । बरु सूचनामार्फत विद्यार्थीहरुलाई मञ्चको कार्यक्रममा हुने कार्यपत्र प्रस्तुतिमा सहभागी हुन सुझाव दिइएको छ ।