टेक्सास, अमेरिका -आगामी अगस्ट १६-१७ ( २०२५) मा हुन गइरहेको गैरआवासीय नेपाली संघ (NRNA) राष्ट्रिय समन्वय परिषद्, अमेरिका (NCC-USA) को २०२५–२०२७ कार्यकालका लागि बोर्ड अफ डाइरेक्टर्स पदमा टेक्सास निवासी समाजसेवी, मृदुभाषी, तथा शिक्षाविद् बाबुराम काफ्लेले आफ्नो उम्मेदवारी प्रस्तुत  गरेका छन् । काफ्लेले आफ्नो उमेद्वारी सतेन्द्र शाहको टिमसँग जोडेर प्रस्तुत गरेका छन् l 

“एनआरएनएमा एकता, आजको आवश्यकता” भन्ने मूल नाराका साथ अघि बढेका काफ्लेले पारदर्शिता, उत्तरदायित्व, समावेशिता र परिणाममुखी कार्यदिशालाई आफ्नो अभियानको केन्द्रविन्दु बनाउने स्पष्ट संकल्प व्यक्त गरेका छन् । 

उम्मेदवारी घोषणा गर्दै काफ्लेले एनआरएनएको नेतृत्व साझा सोच, सहभागिता र जवाफदेहीतामा आधारित हुनुपर्ने धारणा राखेका छन् । “संस्थागत सुधार र समावेशी संरचनाबाट मात्र एनआरएनएलाई विश्वसनीय र प्रभावशाली बनाउन सकिन्छ,” काफ्लेको तर्क छ l 

काफ्ले भन्छन् :“नेपालमा मैले शिक्षादानको माध्यमबाट समाज रूपान्तरणको प्रयास थालेँ । जब अमेरिका आएँ, त्यही सेवाभावलाई अन्तर्राष्ट्रिय स्तरमा फैलाउने सोच बनाएँ ।” काफ्लेको यही प्रयास र सोचलाई पुरस्कृत गर्न उनको उमेद्वारीलाई सार्थक परिणाम दिनुपर्नेमा प्रवासी नेपालीहरूको मत रहेको छ l काफ्लेको उमेद्वारीले एउटा आसा र उल्लास थपेको कुरा अमेरिकी नेपाली समाजमा चर्चाको विषय रहेको विश्लेषकहरू सुनाउँछन् l 

शिक्षा, सामाजिक सेवा र संस्थागत सुधारमा लामो अनुभव बोकेका काफ्ले प्रवासी नेपालीहरूबीच नेतृत्वको नयाँ धारको रूपमा स्थापित हुँदैछन् । उनीसँग स्थानीयदेखि अन्तर्राष्ट्रिय समुदायमा काम गरेको अनुभव छ, जसले एनसीसी अमेरिकालाई नयाँ दिशा दिन सक्ने विश्वास गरिन्छ l  

काफ्लेको उम्मेदवारीले एनआरएनए अमेरिकाको चुनावी अभियानमा विचार, मूल्य र सेवामूलक नेतृत्वको एजेन्डा थपेको छ। राजनीतिक प्रचारभन्दा संस्थागत नवीकरण र नीतिगत सुधारलाई प्राथमिकतामा राख्ने काफ्लेको अभियानले संगठनभित्र सकारात्मक लहर ल्याएको अमेरिका निवासी नेपालीहरूको अनुभव छ l 

एनआरएनएको आगामी नेतृत्वमा काफ्लेको सक्रियता र स्पष्ट दृष्टिकोणले संगठनलाई अझ मजबुत, समावेशी र गौरवशाली बनाउने अपेक्षा गरिएको छ । 

दोलखा जिल्ला तामाकोसी गाउँपालिका, वडा नं. १ भिरकोट स्थायी घर भएका बाबुराम काफ्ले, नेपाली भाषा र साहित्यका स्नातकोत्तर हुन् l लेखन, पुस्तक प्रकाशन, शिक्षण र विभिन्न संस्थाको नेतृत्व काफ्लेका अतिरिक्त योग्यताहरू हुन् l  सर्जक, समाजसेवी, राजनीति, साहित्य  र लेखक काफ्ले भित्रका बहुआयामिक पक्ष छन् l  काफ्ले समन्वयकारी र सक्षम युवा हुन्  l 

प्रवासी नेपालीको हकहित नै बाबुराम काफ्लेको मुख्य चुनावी नारा रहेका छन् l उनी भन्छन् : 'पारदर्शिता र जबाफ देही नेतृत्व बिना आजको कुनै पनि चुनौती सामना गर्न सकिन्न तसर्थ मेरो उमेद्वारी पारदर्शी नेतृत्व स्थापना र सिद्धान्तलाई दृष्टान्त बनाउनको लागि हो l आसा छ मेरो विश्वास र सङ्कल्पले गैरआवासीय नेपाली संघ (NRNA) राष्ट्रिय समन्वय परिषद्, अमेरिका (NCC-USA) को २०२५–२०२७ कार्यकालका लागि बोर्ड अफ डाइरेक्टर्स पदको भूमिका पाउनेछ l'

स्मरणीय : फोटो बाबुराम काफ्लेले उपलब्ध गराएका हुन् l