१.

जाबो एक दिनभरि पनि बिर्सिन नसक्नु कारण के होला ?
कसैको याद मनभरि झङ्कृत गराइरहने प्रसारण के होला ?
आफूले आफ्नै मनोविज्ञान पनि थाहा नपाइनु अचम्मै लाग्छ !
यस्तो अवस्थालाई सम्बोधन गर्ने ध्वनि/उच्चारण के होला ?

                    २.

संसारकै स्रष्टा नारी, धातृ हजुरलाई
सन्तानकी जीवन,ममतादातृ हजुरलाई   स्वर्गवासी देवदेवी मेरो बिन्ती लागोस्
मेरो श्रद्धा पुगोस् मेरी मातृ हजुरलाई !

हाम्री ममतामयी माता सीता देवी कार्कीको चौधौं पुण्यतिथिका अवसरमा हामी सबै सन्तानका तर्फबाट हार्दिक श्रद्धाञ्जली अर्पण गर्दछौं ।
- शर्मिला कार्की

                    ३.

कति चीन,जापान जान्छन् ,कति अमेरिका जान्छन्
सम्पन्न मुलुकमा छौं भनेर हामीलाई तुच्छ ठान्छन्
तिनका पनि कथाव्यथा छ्याङ्ङ हुँदै आएका छन्
थोरै जसोले सुविधा खान्छन् ,धेरैजसोले गोता खान्छन् !

                    ४.

फूलहरूजस्तै सुवास छर्ने हुन पाए हुन्थ्यो
सौन्दर्यको पल्लो सिमाना छुन पाए हुन्थ्यो
फूल र यौवन झर्छ,खस्किन्छ ,सम्झिएर चस्स दुख्छ
यस्तो दुखाइ र दिगो वेदना धुन पाए हुन्थ्यो ।