मङ्सिर,७ दोलखा: गोरखापत्र संस्थान, मधुपर्क मासिकको आयोजना तथा शैलुङ गाउँपालिका, शैलुङ पर्यटन तथा कालापानी बजार टोल विकास संस्थाको सह-आयोजनामा २०८२ मङ्सिर ६ गते दोलखा जिल्लास्थित प्रसिद्ध पर्यटकीय स्थल शैलुङमा साहित्यिक कार्यक्रमतथा साहित्यकार कवि लेखक पत्रकारहरूको साहित्यिक पर्यटन भ्रमण सम्पन्न भएको छ l 

मधुपर्कका सम्पादक त्रिभुवनचन्द्र वाग्लेको अगुवाइमा काठमाडौँबाट मङ्सिर ५ गते शुरु भएको दुई दिवसीय भ्रमण टोलीमा २८ जना कवि तथा साहित्यकारहरूको उपस्थिति रहेको थियो र शैलुङ्गमा दोलखा जिल्लाका  अन्य पत्रकारहरूको पनि उपस्थिति रहेको थियो ।
सहभागी साहित्यकारहरूमा किशोर पहाडी, युवराज नयाँघरे, जय छाङ्छा, जयदेव भट्टराई, सुभाषचन्द्र पौडेल'भीमफेदीया', मणि लोहनी, रञ्जना निरौला, अनिता कोइराला, उषा केसी, तुलसीहरि कोइराला, गीता रेग्मी, श्रीबाबु कार्की, अञ्जना पौडेल, चेतनपथ माधव, विष्णु आचार्य, भगवती बस्नेत, ऋषभ देव घिमिरे, उत्तम भट्टराई, कर्ण दयाल, सुमन घिमिरे, सुशीला शर्मा, सुशीला खड्का हसिना, रेखा शर्मा, प्रवीण थपलिया, लक्ष्मी ढकाल, मुरारि सिग्देल, नन्दु उप्रेती, पवित्रा सुवेदी तथा विमुन्स पौडेल रहेका थिए ।
त्यसैगरी,टोलीमा तीनधारा मिडियाबाट बालकृष्ण श्रेष्ठ'पासा', रेडियो नेपालबाट मनोजा कुँवर, तोकआदेश डटकमबाट सर्वेन्द्र निरौला, स्पेस फोर के टिभीबाट डेबिट पाण्डेय, वाग्मती टिभीबाट बालकृष्ण शर्मा, हिमालय टाइम्सबाट अक्कल कुँवर, प्राइम टिभीबाट कमलमणि पोखरेल र कृष्ण मल्ल, समाजसेवी नवीन शाही तथा प्राध्यापक जयन्तनाथ खनाल, गीतकार जानुका राई रहेका थिए ।
भ्रमण टोलीलाई शैलुङ गाउँपालिकाका अध्यक्ष रिमलबाबु श्रेष्ठले गाउँपालिका प्राङ्गणमा भव्य स्वागत गर्दै शैलुङको ऐतिहासिक,धार्मिक तथा पर्यटकीय महत्त्वबारे प्रकाश पार्दै साहित्यकारहरूको भ्रमणले यस क्षेत्रको पर्यटन व्यवसायमा उल्लेखनीय योगदान पुग्ने विश्वास व्यक्त गर्दै साहित्यकारहरूप्रति आभार व्यक्त गरे ।
मधुपर्कका सम्पादक त्रिभुवनचन्द्र वाग्लेले साहित्यकारहरू काठमाडौंबाट रित्तै हात आए पनि यहाँबाट फर्किँदा मुटुभरि शैलुङको माटोको सुगन्ध, मीठो सम्झना र आँखाभरि सुन्दर दृश्यहरू बोकेर जानेछौँ भनेर बताए।
गाउँपालिकाका प्रशासकीय अधिकृत सन्जीव न्यौपानेले साहित्यकारहरूको स्वागत गर्दै गाउँपालिकाका बारेमा संक्षेपमा प्रकाश पारेका थिए ।
त्यसैगरी, दोस्रो दिन अर्थात् २०८२ मङ्सिर ६ गते शनिवारका दिन बिहान कालापानी टोल विकास संस्थाले साहित्यकार तथा पत्रकारहरूलाई फूलको माला लगाइदिएर पञ्चे बाजाको धुनसँगै बजार परिक्रमा गराउँदै शैलुङको थुम्कोमा पुर्याएका थिए। करिब ३१०० फिटको उचाइमा रहेको शैलुङको थुम्को
स्थित बुद्धको सुन्दर गुम्बाको प्राङ्गणमा गोरखापत्र साहित्य सम्मेलनको आयोजना गरिएको थियोे।
सम्मेलनमा साहित्यकारहरूबाट रचना वाचन पनि गरिएको थियोे ।
गोरखापत्र दैनिकका कामु प्रधान सम्पादक जुनारबहादुरको सभापतित्वमा भएको कार्यक्रमका प्रमुख अतिथि गोरखापत्रका महाप्रबन्धक लालबहादुर ऐयर रहेका थिए भने अन्य विशिष्ट अतिथिहरूमा शैलुङ गाउँपालिका अध्यक्ष रिमल बाबु श्रेष्ठ, वडा नम्बर ८ का अध्यक्ष धनबहादुर तामाङ, टोल विकास संस्थाका अध्यक्ष रुद्र थपलिया, समाजसेवी सोभित उप्रेती लगायतको उपस्थिति रहेको थियोे।
कार्यक्रममा स्थानीय कवि, विद्यार्थीवर्ग तथा काठमाडौंबाट आएका कविहरूले आ-आफ्ना रचना वाचन गरी गौरीशङ्कर हिमाललाई टाढैबाट साक्षी राखेर मनोरमस्थल शैलुङलाई साहित्यमय बनाएका थिए।
रचना वाचन गर्ने कविहरूमा सुभाषचन्द्र पौडेल'भीमफेदीया', नन्दु उप्रेती, रञ्जना निरौला, विमुन्स पौडेल, अञ्जना पौडेल, त्रिभुवनचन्द्र वाग्ले, लक्की चौधरी, राजु महत, तीर्थ अधिकारी, जानुका राई, अमरदीप सुनुवार तथा बालकृष्ण थपलिया लगायत रहेका थिए ।
कार्यक्रममा प्रमुख अतिथि,अन्य अतिथिहरूले मन्तव्य राख्ने क्रममा शैलुङको धार्मिक,ऐतिहासिक तथा पर्यटकीय महत्त्वका बारे प्रकाश पारेका थिए ।
मधुपर्कका सम्पादक त्रिभुवनचन्द्र वाग्लेले गोरखापत्र र मधुपर्कले शैलुङलाई उज्यालो पार्न खोजेको बताए । हुन त शैलुङ आफै उज्यालो भए पनि सूर्यलाई बत्ती बालेर देखाउने काम भएको बताए ।
दुई दिनसम्म साहित्यकार तथा पत्रकारहरूलाई शैलुङको अवलोकन भ्रमण गराएर गोरखापत्र र मधुपर्कले साहित्यको उन्ननयन तथा शैलुङको धार्मिक, ऐतिहासिक तथा पर्यटकीय प्रवर्द्धनमा उल्लेख्य योगदान पुर्याएको कुरा सहभागीहरूले बताएका छन् ।
दुई दिवसीय कार्यक्रम सम्पन्न गरी काठमाडौं फर्कने क्रममा बाटोमा पर्ने दुर्गा माध्यमिक विद्यालयको पुस्तकालयका लागि गोरखापत्रका प्रकाशनहरूका साथै अन्य साहित्यकारहरूले आ-आफ्नो तर्फबाट लगिदिएका कृतिहरू हस्तान्तरण गरिएका थिए ।

स्मरणीय : फोटो स्रोत श्रीबाबु कार्की