१५ साउन, काठमाडौं । बजाज र टीभीएसपछि यामाहाले पनि नेपालमै आफ्नो एसेम्बल प्लान्ट स्थापना गर्ने भएको छ । यसका लागि कम्पनीले नवलपरासीमा जग्गाको व्यवस्था गरिसकेको छ ।

कम्पनी दर्ताको प्रक्रिया पनि सकाएको छ । यामाहाले तल्लो रेन्ज र बढी माग हुने मोडलका बाइकहरु उत्पादनका लागि प्लान्ट खोल्न लागेको हो ।

‘प्लान्ट राख्न तयारी अघि बढेको छ, कहिलेबाट उत्पादन हुने भन्ने तय भइसकेको छैन’ कम्पनीका एक अधिकारीले भने ।

मोरङ अटोवर्क्स (एमएडब्ल्यू)ले यसअघि नै जपानिज बाइक उत्पादक कम्पनी यामाहालाई प्लान्ट स्थापनाका लागि आग्रह गर्दै आएको थियो । तर, सुरुमा खासै रुची नदेखाएको कम्पनीले पछिल्ला दिनमा सरकारले ‘अनएसेम्बल्ड बाइक’को आयातमा छुट दिने र ‘एसेम्बल बाइक’मा कर बढाउने नीति लिएपछि प्लान्ट स्थापनाको अनुमति दिएको हो ।