काठमाण्डू बलियाको हो, बाङ्गाको हो 

भोका नाङ्गाको होइन, अघाएका नाङ्गाको हो !

घर नहुनेको होइन

भारी बोक्नेको होइन !

डोको राख्ने ठाउँ भाडमा लिएर 

तरकारी जोख्नेको होइन !

मात लागेर खोक्नेको हो काठमाण्डू  

दम लागेर खोक्नेको होइन   

काठमाण्डू नेपालभाषीको होइन

नेपालभाषीको पनि होइन

दास,दासीको हो काठमाण्डू 

काठमाण्डू हाकु पटासीको होइन !

होइन, हुँदो कुरो बोल्नेको होइन 

नाङ्गलो पसल खोल्नेको होइन !

सुनका घोगा पोल्नेको हो, काठमाण्डू  

मकैका घोगा पोल्नेको होइन  !

दिल्ली, बेइजिङ्ग, वासिङ्गटन 

कसको हो काठमाण्डू मलाई थाहा छैन !

मेरो साथी मलाई यति थाहा छ - 

काठमाण्डू तिम्रो होइन 

काठमाण्डू मेरो होइन  ! ! 

स्मरणीय:कवि अर्जुन पराजुलीको अनुमतिमा उहाँको फोटो र कविता akabarey.com ले प्रकाशित गरेको छ  ( सम्पादक ) l