रास्वपाका केन्द्रीय सदस्य गणेश कार्कीले आफ्नो पार्टी रास्वपा अनायास सरकारमा गएको र पार्टी सरकारमा जाने निर्णय समाचारहरूबाट थाहा पाएँ भन्दै आफ्नो गुनासो र जिज्ञासा पार्टी समक्ष राखेको पत्र सार्वजनिक गरेका छन् l मैले कुरा फेर्न नजानेका कारण साथीहरूमा पर्न गएको असुविधाको लागि भन्दै कार्कीले क्षमा याचना समेत गरेका छन् l 

उनले लेखेका छन् : 'चुनाव अगाडिका हाम्रा रणनीति, हामीबाट सार्वजनिक भएका विचार र व्यक्तव्यहरू, हाम्रा वाचापत्र र केही अगाडि पनि अब यिनलाई बोक्दैनौ भनेको सम्झना भयो भन्दै थपेका छन् : सत्तास्वार्थकै कारण जोसँग पनि मिल्ने र छुट्टिने गरेको देखेर 'जुन जोगी आए पनि कानै चिरेको' भनेर आम नागरिकहरूको निराश मनस्थितिमा हामी अलग छौं अलग रहने छौं र अलग गर्नेछौं भनेर मत मागेका थियौ तर हामी पनि उनीहरू जस्तै छौं भन्न आफ्नै कान किन आफैले चिर्न थाल्यौं मसँग जवाफ छैन'भनेर कार्कीले  प्रश्न गरेका छन् l

'अधिकतम २५ जनाको मन्त्रीमण्डलामा प्रतिनिधिसभामा मात्रै २७५ सांसद हुन्छन् l मन्त्री नभइ केही गर्न सकिन्न भन्ने भाष्य निर्माण गर्ने हो भने मन्त्री हुन् बाँकी सांसदहरूको उपस्थिति अर्थ हीन बेकाम्मे भन्न मिल्छ कि मिल्दैन मसँग यसको जबाफ छैन l यस्ता थुप्रै नागरिकका प्रश्न र जिज्ञासाहरू जसको जबाफ मसँग छैन त्यसैले नैतिकताको आधारमा सरकारलाई समर्थन गर्ने कुरामा र सरकारमा जाने कुरामा मेरो असहमति छ l'

आफ्नो असहमति पत्र दर्ता गरिदिन अनुरोध गर्दै पार्टीका कार्यलय सचिवका नाममा रास्वपा केन्द्रीय सदस्य गणेश कार्कीले रास्वपा सभापति, संसदीय दलको नेता र नेपाली नागरिकलाई बोधार्थ दिएर पत्र सार्वजनिक गरेका छन् : गणेश कार्की द्वारा सार्वजनिक गरिएको पत्र जस्ताको त्यस्तै :

मिति : २१ फागुन २०८०

श्री कार्यालय सचिवज्यू

राष्ट्रिय स्वतन्त्र पार्टी केन्द्रीय कार्यालय,

घण्टी घर, बनस्थली

बिषय : असहमति पत्र ।

नमस्कार,

हाम्रो राष्ट्रिय स्वतन्त्र पार्टी सरकारमा गएछ, समाचारहरुबाट थाहा पाएँ । ... नेकपा (माओवादी केन्द्र) का संसदीय दलका नेता श्री पुष्पकमल दाहाल प्रचण्डलाई प्रधानमन्त्री पदमा हाम्रो समर्थन रहेको समाचार र सामाजिक सञ्जालहरुमा देख्न पाएँ । चुनाव अगाडिका हाम्रा रणनीति, हामीबाट सार्वजनिक भएका विचार र व्यक्तव्यहरु, हाम्रा वाचापत्र र केहि अगाडि पनि अब यीनलाई बोक्दैनौँ भनेको सम्झना भयो । थाहा छ, एक थान केन्द्रीय सदस्यलाई भएको सम्झनाले पार्टीको निणर्यमा फरक पर्दैन । उसो त अनौपचारिकरुपमा अनेकौँ पटक तथा केन्द्रीय समिति र संसदीय दलको संयुक्त बैठकमा औपचारिकरुपमा सांसदको सरकार बनाउने/ढाल्ने भन्दा अन्य धेरै जनमुखी कामहरु हुन सक्छन्, तिनलाई प्राथमिकता दिउँ भन्ने मेरो धारणाले पनि फरक पारेन । त्यो मेरो व्यक्तिगत धारणामा सिमित रह्यो । तर यसमा मलाई व्यक्तिगतरुपमा अन्याय भएको भन्ने लागेको छैन किनभने स्वयम पार्टी सभापतिबाट व्यक्त भएका असंख्य विचारहरु पनि केवल व्यक्तिगत धारणामा सिमित भएका देखिए । ति संस्थागत हुन्थे भने 'रोक्ने यीनीहरुलाई भनिएका नेताुहरुलाई उनीहरु भन्दा पहिले पुगेर 'जंगलबाट आएकाहरुले पनि जंगलीराज पुग्योु भनिएकाहरुकै 'राज'लाई झन् सहज बनाइन्न थियो कि ! त्यस्तो के बाध्यताले 'रोक्ने भनिएकाहरुलाई नै बोक्ने’ कित्तामा समाहित नभइ जनमुखी काम गर्नै सकिन्न भन्ने निष्कर्षमा पुगियो ? यो प्रश्नको जवाफ मसँग छैन । सत्तास्वार्थकै कारण जोसँग पनि मिल्ने र छुट्टिने गरेको देखेर 'जुन जोगी आए पनि कानै चिरेको' भनेर आमनागरिकहरुको निराश मनस्थितिमा हामी अलग छौँ, अलग रहनेछौँ र अलग गर्नेछौँ भनेर मत मागेका थियौँ । हामी पनि उनीहरु जस्तै छौँ भन्न 'आफ्नै कान किन आफैले चिर्न थाल्यौँ ?' यो प्रश्नको जवाफ मसँग छैन । प्रचण्ड नेतृत्वमा कांग्रेस हटाएर एमाले हुँदैमा के फरक पर्छ ? र पुरानाकै नेतृत्वमा सरकार बन्दा कुन आशाको सञ्चार हुन्छ ? यो नखोजी एमालेसँग अंगालो हाल्दै किन बालुवाटार गयौँ ? यसको जवाफ मसँग छैन । अधिकतम २५ जनाको मन्त्रिपरिषद हुने नेपालमा प्रतिनिधिसभामा मात्रै २७५ सांसद हुन्छन् । मन्त्री नभइ केहि गर्नै नसकिने भाष्य निर्माण गर्ने हो भने त्यसले मन्त्री हुनबाट बाँकी रहने २५० सांसदहरुको उपस्थितिलाई अर्थहीन, बेकाम्मे भन्छ कि भन्दैन ? यसको जवाफ मसँग छैन । वाचापत्रमा फाइल खोल्ने भनेर हाम्रो वाचापत्रमा नै लेखिएका मुद्दाहरु ललिता निवास सरकारी जग्गा किनबेच काण्ड, वाइड बडी विमान खरिद काण्ड, कोभिड भ्याक्सिन खरिद काण्ड, यति र ओम्नी काण्ड, प्रिन्टिङ प्रेस खरिदको ७० करोड रुपैयाँ काण्ड लगायतका काण्डहरु अब के हुन्छन् ? हामीले दस्तावेजमा गरेको गत ५ बर्षको राजनीतिक समिक्षा केवल मतदातालाई झुक्याउने प्रपञ्च मात्रै थियो कि के थियो ? त्यसमा संलग्न भनेर विवादित रहेका व्यक्तिहरुकै सहभागितामा यी काण्डहरुको निष्पक्ष छानविन हुन सम्भव होला ? राष्ट्रपति गैरराजनीतिक व्यक्ति हुनु पर्ने भन्दै वकालत गरेका हामीले आफ्नोतर्फबाट गैरराजनीतिक व्यक्तिलाई राष्ट्रपतिको उम्मेदवार बनाउँन सकौँला ? खारेजै गर्नु पर्छ भनिएको संवैधानिक परिषदमा रहने पद हाम्रो भागमा पर्यो भने हामी नाइँ भनौँला ? हाम्रो पार्टीको चरित्र हिजो हामीले नै आलोचना गरेका पार्टीहरु भन्दा भिन्न के भयो ? यस्ता धेरै प्रश्नहरु दिमागमा खेलिरहेका छन्, नागरिकहरुले सोधिरहेका छन्, जसको जवाफ मसँग छैन । यी प्रश्नहरुको जवाफ दिन नसके पछि आफ्नो नैतिकताले सरकारलाई समर्थन गर्ने कुरामा सहमत हुन सकिन । यसैले सरकारलाई समर्थन गर्ने वा सरकारमा जाने निणर्यमा असहमत रहेको जानकारी गराउन यो असहमति पत्र लेखेको हुँ । कृपया ! दर्ता गरिदिनु हुन अनुरोध गर्दछु ।

गणेश कार्की केन्द्रीय सदस्य

बोदार्थ : १. सभापति, राष्ट्रिय स्वतन्त्र पार्टी

२. संसदीय दलको नेता, राष्ट्रिय स्वतन्त्र पार्टी

३. नेपाली नागरिक

स्मरणीय : गणेश कार्कीको  फेस बुकबाट akabarey.com ले फोटो साभार गरेको छ l