काठमाडौँ, फाल्गुन ६ 

मेलम्ची खानेपानी परियोजनामा अनियमितता गरेको अभियोगमा नेपाल सरकारका तीन पूर्वसचिवलगायत  १८ जनाविरुद्ध भ्रष्टाचार मुद्दा दायर भएको छ ।

अख्तियार दुरूपयोग अनुसन्धान आयोगले आइतबार विशेष अदालतमा मुद्दा दायर गरेको हो । पूर्वसचिवहरू सञ्जय शर्मा, भीम उपाध्याय र गजेन्द्र ठाकुरसहितलाई प्रतिवादी बनाएर मुद्दा दायर गरेको हो।

भ्याटबाहेक ७ अर्ब ७२ करोड रुपैँयामा ठेक्का सम्झौता गर्दा सम्झौता विपरित कानुनले तोके भन्दा बढी पेस्की मोबिलाईजेशन गरेको आरोप उनीहरूमाथि छ । आयोगले मेलम्ची खानेपानी  विकास समितिका तत्कालीन बोर्ड सदस्य रुद्रसिंह तामाङ विरुद्ध पनि भ्रष्टाचार मुद्दा दायर गरेको छ । तामाङ हाल अध्यागमन विभागका महानिर्देशक छन्  l  
सचिवहरूमा  क्रमशः शर्मा, उपाध्याय, गजेन्द्रकुमार ठाकुरविरुद्ध आयोगले क्रमशः ६ करोड ९७ लाख ८३ हजार एक सय ७८ रुपैँया ९६ पैसा, चार करोड ११ लाख ३४ हजार दुई सय ७९ रुपैँया ९२ पैसा र ६० करोड ४९ लाख १९ हजार ८ सय ८४ रुपैँया ३१ पैसा विगोसहितको मागदावी पेश भएको छ l 

 त्यस्तै परामर्शदाताहरू तथा निर्माण कम्पनी विरुद्ध पनि सार्वजनिक सम्पत्ति हानी नोक्सानी गरी भ्रष्टाचार गरेको भन्दै आरोप-पत्र दायर भएको अख्तियारले बताएको छ l  

स्मरणीय पूर्व सचिव भीम उपाध्याय सामाजिक संजालमा अत्यतै चर्चामा रहने पात्र हुन् l विसंगति र वेथिति उजगार गर्न र आपदमा परेकालाई सहयोग गर्न उपाध्यायले सामाजिक संजालको अधिकतम उपयोग गरेका छन् l विभिन्न जानकारी पस्कने र भ्रष्टाचार विरुद्द क कसलाई कहिले मुद्धा दर्ता भएको जानकारी समेत हिजोसम्म भीम उपाध्यायको फेस बुकबाट आइरहेको छ l 

फोटो: भीम उपाध्यायको सामाजिक सन्जालबाट साभार