दोलखा, झुले: तामाकोसी गाउँपालिकाद्वारा आयोजित सातौं अन्तरविद्यालय खेलकुद प्रतियोगिता अन्तर विद्यालय 'राष्ट्रपति रनिङ्गशिल्ड २०८२' प्रतियोगिता सम्पन्न भएको छ ।

श्री अमर मा.वि.र श्री जनप्रभात मा.वि.को संयुक्त व्यवस्थापनमा मङ्सिर १७ देखि २० सम्म संचालित उक्त खेलकुद प्रतियोगितामा छात्र र छात्रा  छुट्टाछुट्टै गरी  २७ स्वर्ण, २७ रजत र ३१ कास्यका लागि ट्रयाक एण्ड फिल्डका २७ वटा इभेन्टमा प्रतिस्पर्धा भएको थियो ।

तामाकोसी गाउँपालिकाका ९ वटा माध्यमिक विद्यालयहरूमात्रै प्रतियोगि रहेको यो खेलकुद प्रतियोगितामा पहिलो पल्ट यो वर्षदेखि छात्र र छात्रा दूवैकोलागि कवर्दी खेललाई पनि समावेश गरिएको हुँदा प्रतियोगिता थप रोचक बनेको थियो ।

एक दिन बढी लम्बिएको प्रतियोगिताको अन्तिम दिन  मङसिर २० गते रात्रिसम्म पुरस्कार वितरण सहितको समापन समारोहको आयोजना गरी पुरस्कार तथा प्रमाण पत्र वितरण गरिएको थियो । प्रतियोगितामा खिम्ती प्रोजेक्ट स्कुलले ६ स्वर्ण ४ रजत र १ काश्य पदक सहित प्रथम भई यो बर्षको रनिङ्गशिल्ड उचाल्न सफल भएको छ । 

 तामाकोसी गाउँपालिका मात्रै नभएर जिल्ला र राष्ट्रिय तहमा नै राम्रा खेलाडीहरू उत्पादन गर्न सक्षम स्थान भनेर कहलिएको झूले खेल मैदानमा भएको प्रतियोगिताको उद्घाटन प्रमुख अतिथिको रूपमा उपस्थित बागमती प्रदेशका प्रदेश सभा सदस्य तथा पूर्व आर्थिक मामिला तथा योजना मन्त्रि माननीय कुन्दनराज काफ्लेले गर्नु भएको थियो भने विशिष्ट अतिथिको रूपमा तामाकोसी गाउँपालिका अध्यक्ष पोर्णप्रताप के.सी.र उपाध्यक्ष सृजना सुवेदीको उपस्थिति थियो ।

प्रमुख अतिथि माननीय कुन्दनराज काफ्लेकै पहलमा यहि आर्थिक वर्ष २०८२÷०८३ मा बागमती प्रदेश सरकारबाट २ करोड १६ लाख विनियोजन भएको “भीमबहादुर तामाङ्ग स्मृति खेलमैदान” को रूपमा प्यारापिट सहित विस्तार गर्न लागिएको सोही खेल मैदानमा प्रतियोगिताका सम्पूर्ण खेलहरू खेलाइएको थियो । 

 तामाकोसी गाउँपालिकाको आयोजनामा भएको यस राष्ट्रपति रनिङ्गशिल्ड– २०८२ को पुरस्कार एवम् प्रमाण–पत्र वितरण लगाएतका औपचारिक समारोहको कार्यक्रम श्री अमर माध्यमिक विद्यालयका विद्यालय व्यवस्थापन समितिका अध्यक्ष हिमालय कार्कीको सभापतित्वमा तामाकोसी गाउँपालिका अध्यक्षको प्रमुख आतिथ्य र उपाध्यक्ष सृजना सुवेदी लगायत अन्य प्रतिष्ठित व्यक्ति आतिथ्यमा सम्पन्न भएको थियो । 
पदक तालिकाः
क्र.सं. विद्यालयको नाम स्वर्ण पदक रजत पदक काश्य पदक कैफियत
१. श्री खिम्ती प्रोजेक्ट स्कुल, वडा नं.५ शहरे ६ ४ १ प्रथम
२. श्री गोल्मेश्वर मा.बि. वडा नं. ४, मालु ६ २ ३ द्घितिय
३. श्री कालिका मा.बि.वडा नं. ६, हावा ४ ५ ४ तृतिय
४. श्री अमर मा.बि.वडा नं.२ झुले ३ ५ ६ चौथो
५. श्री सितापाइला मा.बि.वडा नं.३, जफे ३ १ ४ पाँचौं
६. श्री जनप्रभात मा.वि.वडा नं. २, झुले २ ४ २ छ्रैटौं
७. श्री जनजागृती मा.बि.वडा नं.५,  शहरे १ ३ २ सातौं
८. श्री नारायणी मा.वि. वडा नं. १, भिरकोट १ २ ४ आठौं
९. श्री महेन्द्र मा.वि. वडा नं. ७ च्यामा १ १ ५ नवौं
 जम्मा पदक २७ २७ ३१ 

स्मरणीय : फोटो स्रोत हिमालय कार्की र झुलेका विभिन्न निकायहरू l