डा. सि.के. राउत एउटा यस्तो नाम, जसले आफ्नो आरामदायी जीवन, उच्च आय र सुनौलो भविष्यलाई त्यागेर आफ्नाे जन्मभूमि मधेस र यहाँका जनता लागि जीवन समर्पण गरे।

जब अमेरिकाजस्तो समृद्ध देशमा उत्कृष्ट रोजगारी थियो, त्यतिबेला धेरैका लागि त्यो सपना नै हुन्थ्यो। तर डा. राउतका लागि त्यो सपना थिएन । उनको सपना त आफ्नै माटो, आफ्नै जनता, आफ्नै मधेसको मुहारमा खुसी देख्नु थियो ।विदेशको चम्किलो जीवन छाडेर, आफ्नो सास सँगै आफ्नै धूलोमा मिसिन आएका डा. राउतले मधेसलाई अधिकार, शिक्षा, स्वास्थ्य र विकासको मूलधारमा ल्याउने गहिरो संकल्प गरेका थिए । उनीसँग कुनै स्वार्थ थिएन, केवल एउटा भावना थियो ।

मधेसका सन्तानले अब पीडा होइन, प्रगति अनुभव गरून् तर दुखको कुरा के हो भने, आज त्यही सपना बोकेर अगाडि बढिरहेकै बेला, उनका आफ्नै नजिकका साथीहरूबाट पटक–पटक घात भइरहेका छन् । जसलाई हात समातेर अगाडि बढाउन खोजेका थिए, कहिलेकाहीं तिनै हातहरूले नै चोट दिएको पीडा लुकाउन सक्दैनन्। यो घटनाहरूले एउटा साधकको मन चिरिएको छ। तर इतिहासले देखाएको छ  जुन व्यक्तिले साँचो माया गर्छ, उसले  त्याग गर्न जान्दछ, सहन जान्दछ, र फेरि फेरि उठ्न पनि जान्दछ ।
डा.सिके राउत कुनै साधारण नेता होइनन् । उनी मधेसका पीडित जनताको आवाज हुन् । उनी त्यो सपना हुन्, जुन हाम्रा आमाबुवाले आफ्ना सन्तानको उज्यालो भविष्यका लागि देखेका थिए ।
जसरी आँधीबेहरीले ठूलो रुखलाई झुक्न बाध्य पार्दैन, त्यसरी नै डा.राउतलाई असल मार्गबाट केही स्वार्थीहरूले डगमगाउन सक्दैनन् । उनी अझै उस्तै अडिग छन्, अझै उस्तै निष्ठावान् छन् किनकि उनको यात्राको प्रेरणा सत्ता होइन, सम्पत्ति होइन, मधेसका लाखौं जनताको मुस्कान हो ।
आज हामीले बुझ्नुपर्छ डा.सिके राउत कुनै व्यक्तिको मात्र नाम होइन, उनी त एक आन्दोलन हुन्, एउटा भरोसा हुन्, एक असल भविष्यका सपना हुन् । हामीले उनीमाथि भरोसा गर्नुपर्छ, उनलाई साथ दिनुपर्छ । किनकि एउटा मानिसले आफ्नो व्यक्तिगत सुख त्यागेर हाम्रो भविष्यको लागि लडिरहेको छ । यस्तो आत्मासँग विश्वास घात गर्नु, वास्तवमा आफ्नै सपना घात गर्नु जस्तै हो ।
डा. राउत एक सपना हुन्, जुन सपना पूरा भएपछि मधेस मात्र होइन, सारा नेपालले गर्व गर्नेछ। हामी सबै मिलेर यो सपना जोगाऔं, यो यात्रामा साथ दिऔं ।

लेखक डा. यादव जनमत पार्टीका केन्द्रीय प्रवक्ता हुन् l फोटो डा. यादवको फेस बुकबाट साभार l