नेपालीहरू मुख्य चाडबाडको मुखमा छौं l असोज १७ गते घटस्थापनादेखि दसैँ विधिवत् सुरु हुनेछ । दसैँलगत्तै तिहार र छठजस्ता थप महत्वपूर्ण चाड पनि क्रमशः आइ नै हाल्छन् । कुनै पनि चाडपर्व जो कसैका लागि पनि रमाइला र स्मरणीय हुन्छन् । आ–आफ्नो गच्छेअनुसार हरेक पर्व सबैले खुसीसाथ मनाउने वातावरण सिर्जना गर्नु हामी सबै र सरकारको कर्तव्य हो । खुशीसँग रम्ने र रमाउने वातावरण दिनु राज्यको धर्म हो । एकै पटक धेरै सवारी साधनको प्रयोग, धेरै बाटोहरू चल्ती धेरै मान्छेको आवागमनलगायत कारणले चाडपर्वहरूमा हुने दुर्घटना,सवारी हैरानीजस्ता कुरामा व्यवसायी र राज्यका निकायहरू बढी संवेदनशील र चनाखो बसेर तदारुकता देखाउनु आवश्यक हुन्छ ।

अग्रिम र सिस्टमेटिक टिकट बुकिंग व्यवसायीलाई सहुलियत यात्रुलाई भरपर्दो र प्रभावकारी सेवामामा राज्यका संयन्त्रहरूले चुस्त ढङ्गले काम गर्ने स्थिति यतिबेलाको मूल आवश्यकता हो l 

दसैँमा विभिन्न पेसा, व्यवसाय र शिक्षादीक्षाका क्रममा देश तथा विदेशका विभिन्न भागमा पुगेका नेपाली घर फर्किन्छन् । घर फर्किने क्रममा उनीहरूले स्थल तथा हवाई यातायातका साधन प्रयोग गर्छन्  l दसैँसाथै अन्य चाडपर्वहरू हाँसोखुसीका साथ मनाउन सवारीसाधनका चालक, यात्रु र सवारीसम्बद्ध सबैले आआफ्नो स्थानबाट सजग, सचेत र इमानदारीसाथ जनहितलाई ध्यानमा राखेर काम गर्नुपर्छ । दसैँलाई भव्य, सभ्य र सुसंस्कृत बनाउन सबैले आ–आफ्नो आचरण र व्यवहार अनि शैलीमा रूपान्तरण गर्नु जरुरी छ । यसका लागि सबैका तर्फबाट केही सचेतता, होसियारी, विवेक र निष्ठाको प्रयोग आवश्यक देखिन्छ । यात्रुको असहजताको फाइदा उठाएर चर्को भाडा असुल्ने अनैतिकताको नियमन पनि यतिबेलाको जरुरी काम हो । दसैँमा घर जाने क्रममा सार्वजनिक सवारी साधनको धेरै भिड र अभाव पनि उत्तिकै हुन्छ l त्यसमाथि काठमाडौँ उपत्यकाभित्र यथोचित बसपार्कहरू छैनन् l भएको बसपार्कमा पनि क्षमताभन्दा बढीको सवारी र यात्रु व्यवस्थापन गर्नु पर्ने कारणले असहज स्थिति छ l त्यसैले दसैंदेखि तिहार हुँदै छठसम्म सरकारको अल्पकालीन बसपार्कको व्यवस्थापनमा ध्यान दिएर सार्वजनिक सवारीलाई सहज बनाउने बातावरण दिनु पर्दछ l काठमाडौँको खुल्ला मन्च लगायत भक्तपुरको सल्लाघारी र त्यस्तै खाली ठाउँमा निश्चित अवधिको लागि अस्थायी बसपार्क बनाउन दिएर नागरिकको सार्वजनिक सवारीलाई सरकारले सहज सर्वसुलभ र प्रभावकारी बनाओस् l