काठमाडौं, असोज १ - राष्ट्रिय स्वतन्त्र पार्टीको पहिलो राष्ट्रिय भेला आजदेखि सुरू हुँदैछ । प्रज्ञा प्रतिष्ठान कमलादीमा आजदेखि सुरु हुने भेला भोलि बुधबार असोज २ सम्म चल्नेछ । भेलाको उदघाटन आज बिहान ९ बजे उपस्थित सबै प्रतिनिधिहरूले  घण्टी बजाएर गरेका छन् l सामुहिक उदघाटनको लागि घण्टी लिएर आउन प्रतिनिधिहरूलाई रास्वपाले आग्रह गरेको थियो l सोही बमोजिम आफूले ल्याएको घण्टी बजाएर राष्ट्रिय भेलाको उदघाटन गरिएको छ l 

 भेलामा विचार, संगठन, संसदीय मामिला, अभियान, मूल्य-मान्यता, उम्मेदवार क्लब/लिडरसिप एकेडेमी, विधान संशोधनलगायतका एजेन्डामा छलफल हुने रास्वपाले जानकारी दिएको छ l 

सभापति रवि लामिछानेले भेलामा राजनीतिक प्रतिवेदन पेस गर्नेछन् भने कार्यवाहक महामन्त्री एवम् संगठन विभागका प्रमुख कवीन्द्र  बुर्लाकोटीले सांगठनिक प्रतिवेदन पेस गर्ने कार्यक्रम तय भएको छ l 

भेलाले प्रथम महाधिवेशनको मितिसमेत तय गर्ने बताइएको छ । भेलामा सहभागी हुन देशभरबाट १५०० बढी प्रतिनिधि काठमाडौँ आएको पार्टीले जनाएको छ । निर्वाचन क्षेत्र समिति, जिल्लाका संयोजक/उपसंयोजक, प्रदेशको समिति/विभाग, केन्द्रीय समिति/विभाग/ आयोगहरूबाट प्रतिनिधित्व रहनेछ ।