काठमाडौँ : निजामती सेवामा कार्यरत कर्मचारीहरूको मर्यादाक्रमअनुसार तलबमान निर्धारण गर्न कर्मचारी युनियनले माग गरेको छ । सरकारका नाममा सर्वोच्च अदालतले मर्यादाक्रमअनुसार तलबमान निर्धारण गर्न परमादेश जारी  गरिसकेको अवस्थामा सोहिअनुसार तलबमान निर्धारण गर्न युनियनले माग गरेको हो । 

निजामती सेवाका राजपत्राङ्कित कर्मचारीहरूको आधारभूत तलबमानलाई मर्यादाक्रममा तादम्य कायम गर्दा यसले निजामती सेवाका अन्य श्रेणीका कर्मचारीहरूलाई समेत प्रभाव पर्ने भएमा सोको समेत यथोचित सुनुवाई र व्यवस्थापन गर्नुपर्ने विषय आदेशमा उल्लेख रहेको भन्दै सबै पद र श्रेणीको मर्यादाक्रम एवं पदासोपान बमोजिम यथासिघ्र तलबमान निर्धारण गर्न नेपाल निजामती कर्मचारी युनियन जिल्ला कार्यसमिति काठमाडौँले माग गरेको हो । 

जिल्ला कार्यसमितिको बैठकले कुनै पनि तह र पदका कर्मचारीलाई अन्याय नहुने गरी सो फैसला कार्यान्वय गर्नु राज्यको कर्तव्य हो भन्दै तलबमान निर्धारणमा कसैमाथि भेदभाव नगर्न सरकारलाई अनुरोध गरेको छ ।

नेपाल निजामती कर्मचारी युनियन जिल्ला कार्यसमिति काठमाडौँका अध्यक्ष टोपलाल अर्यालले भने " सरकारले तिनै तहमा कार्यरत सबै पद र श्रेणीका कर्मचारीको पदसोपान् एवं मर्यादाक्रम बमोजिम तलबमान निर्धारण गर्ने विश्वास लिएका छौं । कुनै पनि कर्मचारीले आफूहरूमाथि अन्याय भएको महसुस हुने अवस्था आएमा आन्दोलन हुन सक्छ। त्यसतर्फ सरकारले ध्यान पुर्याउनु पर्दछ ।"

बैठकका सहभागीहरुले पदसोपान एवं मर्यादाक्रमका आधारमा तलबमान निर्धारण गर्न र यथासिघ्र संघीय निजामती सेवा ऐन जारी गर्न सरकार र सरोकारवाला निकायलाई दबाब दिनु पर्ने विचार राखेका थिए । 

कर्मचारी युनियन जिल्ला कार्यसमिति काठमाडौँका जिल्ला सचिव प्रेम प्रसाद पौडेलका अनुसार आजको बैठकले सम्मानित सर्वोच्च अदालतको आदेश बमोजिम मर्यादाक्रम एवं पदसोपान बमोजिम तत्काल तलबमान निर्धारण गर्न सरकारसँग माग गर्ने तथा यसमा आवश्यक पहल गर्न युनियन केन्द्रीय कार्यसमितिलाई अनुरोध गर्ने, कर्मचारी युनियनको नवौं महाधिवेशनको लागि सदस्यता वितरण गर्ने, स्थानीय र प्राथमिक कार्यसमिति गठन गर्ने लगायतका विभिन्न निर्णय गरेको छ ।