सर्लाही, साउन ७ - पूर्व राज्यमन्त्री रामचन्द्र रायको हत्या भएको छ । सर्लाहीको चन्द्रपुर गाउँपालिका-१ रतनपुरस्थित घरको कोठाभित्र ८० वर्षीय रायको आइतबार राति हत्या भएको हो ।

पूर्व राज्यमन्त्री राय आइतबार मात्रै रतनपुर आएको र  उनी परिवारसहित मलंगवा बस्ने गरेको बुझिएको छ l  रतनपुरमा भएको त्यो घर पुरानो हो। त्यहाँ उनको खेतीपाती पनि छ।

 खेतीपाती हेर्न उनी रतनपुर आइरहेका हुन्छन् । त्यहाँ खाना बनाउनका लागि भनेर एकजना भान्से पनि राखेका छन् ।

प्रहरीका अनुसार टाउकोमा धारिलो हतियार प्रहार गरी हत्या गरिएको अवस्थामा आफ्नै निवासमा उनी मृत भेटिएका हुन् ।

अहिले मधेश प्रदेश प्रहरी कार्यालय जनकपुरको  टोली घटनास्थलमा पुगीसकेको छ । हत्यामा संलग्न व्यक्तिको खोजी भइरहेको प्रहरीले जनाएको छ । प्रहरीले मुचुल्का उठाएर शवलाई सर्लाही सदरमुकाम मलंगवास्थित प्रादेशिक अस्पतालमा लगेको छ ।

राय राप्रपाबाट ३० वर्षअघि भूमिव्यवस्था राज्यमन्त्री भएका थिए । राय राष्ट्रिय प्रजातन्त्र पार्टी (राप्रपा)का केन्द्रीय सदस्य समेत हुन् ।
स्मरणीय : फोटो सामाजिक संजालबाट साभार l