हामीले अकबरेका ’दश प्रश्न’ सुरु गरेका छौं । यस शृङ्खलामा समाजका विविध क्षेत्रका मानिसहरूलाई हामी ’दश प्रश्न’ सोध्छौं । 
हामीसँग दोस्रो शृङ्खलामा हुनुहुन्छ - तीसको दशकका चर्चित साहित्यकार श्री दिव्य गिरी । उहाँ नेपाली साहित्यमा कविता, मुक्तक, कथा, लघुकथा, गजल, हाइकु र तांका जस्ता बहुविधामा कलम चलाउनु हुन्छ । उहाँ संवत् २०११ सालमा माता मिनु गिरी र पिता भरत गिरीका पहिलो सन्तानका रूपमा ललितपुर जिल्लाको इमाडोलमा जन्मनुभएको हो । उहाँका विभिन्न विधामा एक दर्जनभन्दा बढी पुस्तकहरू प्रकाशित छन् । हालै उहाँको ’ईश्वरको अनुहार’ कथासङ्ग्रह प्रकाशित भएको छ । अकबरेडटकमको ’दश प्रश्न’ मा यो पटक कवि तथा कथाकार श्री दिव्य गिरी – 

१. नमस्कार ! आराम हुनुहुन्छ ? आजभोलि कसरी चल्दैछ तपाईंको दैनिकी ?   
 - नमस्कार, आराम नै छु । साहित्यकारको दैनिकी प्रायःजसो लेखन, अध्ययन, प्रकाशन र यसो साहित्यिक कार्यक्रममा सहभागिता जनाउने हो । म मेरो हालै प्रकाशित दोस्रो कथासङ्ग्रह ‘ईश्वरको अनुहार’ बारे एउटा अन्तरक्रिया गर्ने तयारी गर्दैछु । 

२. तपाईंको जीवनमा सम्झिनै पर्ने कुनै विशेष दिनको स्मृति छ भने सुनाइदिनुहोस् न ?
 - मैले पहिलो पटक २०२९ सालमा लोकसेवा आयोगमा बहिदार पदमा पास भएर जागिरे भएको दिन २०२९ साल बैशाख ९ गतेको दिन विशेष लाग्छ र त्यो दिन मलाई धेरै सम्झना आउँछ । 
    
३. तपाईंले आफ्नो नियमित काम बाहेक घर–भान्सामा कत्तिको सघाउनु हुन्छ ?
 - सानै उमेरदेखि मैले खाना बनाउँदै आएको छु । त्यो काम अहिले पनि कहिलेकाहीँ गर्ने गर्दछु । सधैँ भान्सामा सघाउनु चाहिँ पर्दैन ।
४. तपाईंको परिवारका सदस्यलाई मनपर्ने तपाईंको उत्कृष्ट ’पाककला’ के हो ? जो तपाईंको परिवारले मीठो र स्वादिलो मानेर खानुहुन्छ ?   
 - त्यस्तो विशेष प्रकारको खाना मलाई बनाउन आउँदैन । गाउँघरमा पकाउने साधारण प्रकारका खानेकुरा पकाउँदा उत्कृट भन्ने हुँदैन । 

५. तपाईलाई मन नपर्ने कुराहरू? जो तपाईंलाई पटक्कै मन पर्दैनन् । 
 - मलाई धुम्रमान र मद्यपान मन पर्दैन । भूट बोल्ने, ढाँट्ने र अरूलाई ठग्ने कामकुरा पटक्कै मन पर्दैन । 

६. तपाईले आफ्नो जीवनमा गरेको उत्कृष्ट कार्य के हो भन्ने लाग्छ ?  
 - मैले अठार महिना तत्कालीन श्री ५ को सरकार र त्रीतालीस वर्ष एघार महिना त्रिभुवन विश्वविद्यालयमा नोकरी गरेर जीवनको अतिमहत्त्वपूर्ण समय बिताएँ र त्यो पनि उत्कृट नै लाग्छ  तापनि मैले गरेको साहित्य सेवा नै उत्कृट कार्य हो भन्ने महसुस गरेको छु । 

७. कसैले जीवनको परिभाषामा के रहेछ ? भन्ने प्रश्न गर्यो भनें – तपाईंको उत्तर के होला ? 
 जीवनलाई परिभाषामा अथ्र्याउनु भन्दा पनि जीवन एक संघर्ष हो भन्ने बुझेको छु ।

८. तपाईंको भर्खरै ‘ईश्वरको अनुहार’ नामक कथासङ्ग्रह आएको छ । के छन् यी कथाहरूमा ? 
 - यो मेरो दोस्रो कथासङ्ग्रह हो । यो भन्दा पहिले अनामिका शीर्षकको कथासङ्ग्रह २०६१ सालमा प्रकाशित भएको थियो । ‘ईश्वरको अनुहार’ कथाभित्र उन्नाइस वटा आधुनिक कथाहरू सङ्गृहित छन् । यसमा नेपाली समाज, दस वर्षभन्दा बढी समय देशमा चलेको कथित जनयुद्धका कथाव्यथा, विदेशमा चलिरहेको युद्धबाट पीडितहरूको सत्य कथा, नारी हिंसा र बाल मनोबैज्ञानिक कथा आदि समेटिएका छन् ।

 ९. तपाईंले आजसम्म मानवीय सेवाभावले कुनै काम गर्नुभएको छ ?
 - मैले २०६३ सालदेखि आफ्नो टोल छिमेकमा यहीँका बासिन्दाहरूबाट सामाजिक कार्यको निम्ति दिनको एक रुपैयाँ योगदान दिने अभियान अन्तर्गत ‘मोतिटार बन्धु सामाजिक कोष’को स्थापना गरेर केही सामाजिक कार्य गर्दै आएको छु । गत चैत महिनामा ३२ जना वृद्धवृद्धाहरूलाई सम्मान गरेका छौं । 
१०. तपाईंले आफैंले आफैंलाई कत्तिको चिन्नु भएको छ ? तपाईंलाई समाजले कसरी चिनोस् भन्ने लाग्छ ? - जीवनमा कहिले पनि ठूलो महत्त्वाकाङ्क्षा राखिएन । म साधारण प्रकृतिको छु र समाजले पनि त्यस्तै गरी चिनोस् भन्ने ठान्दछु ।