इतिहासका अनुभव बिर्सदा, आफ्ना आदर्शबाट विचलित हुँदा र धरातल भुल्दा कति अपमानित, कमजोर र घाइते हुनु पर्ने रहेछ हेक्का राख्न सकिएन । झन आफ्ना मूल्य, मान्यता,स्वाभिमान, विरासत, स्खलन भएपछि के हालत हुन्छ सायदै अनुभव गरेका हौंला ? देशलाई संविधान, प्रजातन्त्र र स्वतन्त्रता दिन सफल भयौं । जनताकोलागि धेरै काम गरेका पनि छौं । त्याग बलिदानले भरिएको गौरवमय इतिहास छ नेपाली राजनीतिमा कसैसँग धेरै र अतुलनीय रूपमा छ भने हामीसँग छ l हाम्रो पुस्ता र अघिल्लो पुस्तासँग छ l यी सब कतिले बुझ पचाए , कतिले बिर्सिए र कतिलाई थाहै छैन भने हाम्रो स्वर, चर्को स्वरले सानो बनायो ।

भ्रष्टाचार नियन्त्रण गर्ने , सुशासन र रोजगारी दिने काम २०४८ साल पछि हामी आफैंले गर्नु पर्ने काम थिए । मलाई याद छ । २०४६ को परिवर्तन पछि लामो समय अदालत, माल र नापीलगायतका कार्यलयहरूमा बिना (पैसा) घुस काम हुन थालेका थिए तर वाममोर्चा र काँग्रेसका केही मन्त्रीहरूले घुस खाएपछि कर्मचारीले फेरि सुरु गरे । त्यसपछि बढाउदै लग्यौं । अहिले आएर अनियन्त्रित र व्यापक बन्यो । आफैले खानेको खाल्डोमा हामी परेका हौँ l 

जो चोर उसैको ठुलो स्वर भने जस्तो जसले दोहोरो नागरिकता लियो,पत्रकार बनेर असुली धन्दा चलायो र सहकारी ठगी गर्यो उही हिरो । वाईवाई पायो । न नीति छ न नियम मान्छ । न जेलनेल पाएको न मृत्युसँग  खेलेको । यो त चोर हो भन्यो जनता उल्टै हामीलाई पो चोर भन्छ । हिजो २०५१ सालमा एमालेलाई दिएको मौकाको काउसो अझै सकसकाउन छाडेको छैन l

रवि लामिछाने नामको रवि  झुल्कि सक्यो । बालेन,हर्क साङपाङ र अरू जादुगरहरूको प्रकोप त बेहोर्न बाँकी नै छ । यी सबैको विकास र जन्म हामी र हाम्रा नेताहरूको कारण भएको हो । यी सबै हाम्रै एजेन्डा लिएर, हाम्रै एजेण्डामा रङ्ग भरेर, लिपपोत गरेर कस्मेटिक प्रयोग गरेर हाईहाई भएका हुन् ।

हामी चैं बेलामा नबोलेर किन चुप बसेको ? जे भयो भयो, जाने मौका पनि गयो । आकाशबाट झर्ला र खाउला  भन्ने दिन गए । हरेस खानु हुदैन, हिक्मत राख्नु पर्छ । मतिबुद्धि सुधारेर मिलेर जानुपर्छ । ईमान,जमान र जन्मभूमि भुल्नु हुदैन । मेहनत गर्नुपर्छ र धैर्य बन्नुपर्छ l  अन्तिम जित हाम्रै हुन्छ । नेतागण हो ! विस्तारै गए अवश्य पुगिन्छ ,हतार गरे भन्न सकिन्न ! कुमालेको चक्र हो । दिन अवश्य फर्कन्छ । फेरि न आत्तिनु , न मात्तिनु र न पात्तिनु ! बस् l 

  लेखक ताराबहादुर कोइराला दोलखा कांग्रेसका नेता हुन् l ( सम्पादक ) akabarey.com