काठमाडौँ, मङ्सिर,२९ 

रुकुम सोती गाउँमा अन्तरजातीय प्रेम र विवाहको निहुँमा हत्या भएका जाजरकोटका नवराज विकसहित ६ जना युवाका आफन्तले अदालतबाट न्याय पाएपछि काठमाडौं आएर शुक्रबार रत्नपार्कमा धन्यवाद सभा गरेका छन् ।    

 साढे तीन वर्षअघि भएको हत्याकाण्डमा जिल्ला अदालत रुकुम पश्चिमले १९ मंसिरमा गरेको फैसलाले न्याय पाएको भन्दै अदालतको गेटमा फूल चढाएर न्यायाधीशलाई सम्मान गरेका आफन्त सहित अधिकारकर्मी दलित अभियन्ता र समाजका विभिन्न क्षेत्रका व्यक्तिहरू सहित  काठमाडौंमा पनि  धन्यवाद र्‍याली निकालेका हुन् । रत्नपार्कमा नवराजका बुवा मुनलाल विकले भुइँ ढोगेर धन्यवाद दिएका थिए । कृतज्ञता ज्ञापन गरेका थिए l 

मुद्दामा न्याय दिने न्यायालय, न्यायाधीश, सरकार र घटनामा सद्भाव राख्ने सबैप्रति धन्यवाद ज्ञापन गरिएको कार्यक्रमको प्रमुख अतिथि थिए राष्ट्रिय दलित आयोगका अध्यक्ष देवराज विश्वकर्मा l आयोगका अध्यक्ष विश्वकर्माको कथन थियो छुवाछुत र जातीय विभेदजस्तो कलङ्क सभ्य मान्छे र सभ्य समाजले सोच्नै सक्दैन l तसर्थ यस्तो घीनलाग्दो प्रथाको जतिसक्दो छिटो अन्त्य हुनुपर्छ l हामी सबैको प्रयत्न यसमा केन्द्रित गरौ l श्रमको सम्मान गर्ने संस्कृति नभएको कारण दलितको श्रम, सिप, क्षमताको अवमूल्यन भएको नतिजा आज देश परनिर्भर भएको छ l 

बिहीबार राष्ट्रिय दलित आयोग पुगेका उनीहरूलाई आयोगले दलित अधिकारकर्मीहरूसमेतको उपस्थितिमा स्वागत गरेको थियो । जातीय भेदभाव र छुवाछुतजस्तो अमानवीय सामाजिक अपराधको घटनामा अहिलेसम्मकै महत्त्वपूर्ण न्यायिक फैसला आएको भन्दै दलित अगुवा र अधिकारकर्मीहरू समेत धन्यवाद र्‍यालीमा सहभागी भएका थिए ।

नवराज विकलगायत परिवारको तर्फबाट बहस गरेका वरिष्ठ अधिवक्ता दिनेश त्रिपाठीले कुनै पनि पाखण्डता अब स्वीकार्य हुँदैन l मानवीय मर्यादा लोकतन्त्र र न्यायाप्रेमिको विजयको रूपमा रूकुम जिल्ला अदालतको फैसलालाई लिनुपर्ने बताए l कार्यक्रममा 'दलितका लागि दलित'का प्रमुख खगेन्द्र सुनारले पनि धन्यवाद मन्तव्य राखेका थिए l हामीले काठमाडौँबाट बाजा बजाएर संसारलाई सुनाउन चाहेका हौँ l अब दलितको न्याय पाउने दिन सुरू भएको छ l दलित र गैरदलित सबै मिलेर यो कलङ्क मेट्न अब ढिला गर्न नहुनेमा खगेन्द्रको विशेष जोड थियो l 

मुद्दामा थुनछेक बहस सकिएपछि पनि घटनामा मारिएका ६ युवाका आमाहरूले काठमाडौंको माइतीघरमा आएर न्याय माग्दै विरोध प्रदर्शन गरेका थिए ।

२०७७ जेठ १० गते रुकुम पश्चिमको चौरजहारी नगरपालिका–८ सोती गाउँकी मल्ल थरकी २१ वर्षीय युवतीलाई भेट्न पुगेका उनका प्रेमी नवराजसहितका साथीहरू स्थानीयको आक्रमणमा परेका थिए । त्यसबेला नवराजसहित उनका साथीहरू सन्दीप विश्वकर्मा, टीकाराम सुनार, गणेश बुढा, लोकेन्द्र सुनार र गोविन्द शाहीको ज्यान गएको थियो।

उनीहरूको शव दुई सातासम्मको खोजीपछि भेरी नदी किनारबाट संकलन गरिएको थियो। घटनामा अरू १२ जना घाइते भएका थिए। घटनालगत्तै नवराजका बुबा मुनलालको जाहेरीमा चौरजहारी–८ का तत्कालीन वडाध्यक्ष डम्बरबहादुर मल्लसहित ३४ जनाविरुद्ध २०७७ जेठ ३२ मा मुद्दा दायर भएको थियो।

त्यसमध्ये ३३ जनालाई कर्तव्य ज्यान, ज्यान मार्ने उद्योग, जातीय भेदभाव र छुवाछुत कसुरको अभियोग र एक जनालाई यी सबै अपराधमा मतियारको भूमिका निर्वाह गरेको अभियोग लागेको थियो। आरोपित ८ जनाले भने सफाइ पाएका छन् ।

न्यायको लडाई अझै सकिएको छैन त्यसैले पुनरावेदन र सर्वोच्च समेत जान सक्ने ठाउँ भएको कारण अझै खबरदारी र सचेतता आवश्यकता रहेकोमा वक्ताहरूको जोड थियो l सो कार्यक्रममा लोकगायक बद्री पंगेनीले पनि गीत गाएर धन्यवाद व्यक्त गरेका थिए l बाजागाजासहित भृकुटीमण्डपबाट सुरू भएको र्याली भद्रकाली सहिदगेट भएर न्युरोड गेट हुँदै शान्ति वाटिका आएर सभामा परिणत भएको थियो l