काठमाडौँ, श्रावण,२  क्रियाशील पत्रकारहरूको साझा मोर्चाले 'नेपाल पत्रकार महासङ्घको विद्यमान समस्या र निकास' नामक अन्तरक्रिया कार्यक्रम सम्पन्न गरेको छ ।महासङ्घभित्र देखिएको राजनीतिक हस्तक्षेपको अन्त्य गर्नुपर्ने मूल विषयमा केन्द्रित रहेर कार्यक्रम संचालन गरिएको थियो । नेपाल पत्रकार महासङ्घका पूर्व अध्यक्ष शिव गाउँले, पूर्व उपाध्यक्ष राधा बुढाथोकी शुद्धिकरण समितिका सदस्य तथा पूर्व सचिव धर्मेन्द्र कर्ण, प्रेस काउन्सिल नेपालका सदस्य दीपक पाण्डेलगायतले अन्तरक्रियामा भाग लिएका थिए ।

बुधबार मधेश मिडिया हाउसमा आयोजित अन्तरक्रिया कार्यक्रममा वक्ताहरूले महासङ्घलाई राजनीतिक हस्तक्षेपबाट मुक्त गराउनुपर्नेमा जोड दिएका छन् । महासङ्घका  पूर्व अध्यक्ष शिव गाउँले नियत सफा राखेर समस्याको समाधान गर्ने हो भने २४औँ घण्टाभित्र विवाद अन्त्य हुने अनि २५औँ घण्टामा चुनाव गराउन सकिने दावी प्रस्तुत गरे ।  महासङ्घकै पदाधिकारीले विद्यमान समस्याको निकास दिन सक्ने बताउँदै गैरपत्रकारको हस्तक्षेपलाई स्वीकार गर्न नहुने सुझाव गाउँलेको थियो । शुद्धिकरण समितिका सदस्य तथा पूर्व सचिव धर्मेन्द्र कर्णले महासङ्घले समयमै चुनाव नगरेर आफ्नो वैद्यानिकता गुमाएको धारणा व्यक्त गरे । तोकिएको मितिमा चुनाव गर्न नसक्ने संस्थाले पत्रकारको हक हितमा कसरी आवाज उठाउन सक्छ भन्ने उनको प्रश्न थियो ।

महासङ्घकी पूर्व उपाध्यक्ष राधा बुढाथोकीले महासङ्घमा गैर पत्रकारको बाहुल्यता धेरै भएकोले श्रमजीवी पत्रकारको पहिचान आवश्यक रहेको बताइन् । उनले महासङ्घले सदस्यताको वितरण गर्दा पत्रकारको पृष्टभूमि हेर्नुपर्ने सुझाव दिइन् । अरूलाई प्रश्न उठाउने औँलाले आज आफ्नै संस्थालाई औँला उठाउनु पर्दा दुख लागेको उनको भनाई थियो l । प्रेस काउन्सिल नेपालका सदस्य दीपक पाण्डेलेमहासङ्घमा सल्लाहकारको भूमिका कमजोर भएको धारणा राख्दै पूर्व अध्यक्षहरूको मौन भूमिकाको विरोध गर्दै आगामी दिनमा खवरदारी गरेर भएपनि चुनाव गराउने गरी भूमिका खेल्न सुझाव दिए । अन्तरक्रिया कार्यकममा विभिन्न सञ्चार माध्यममा क्रियाशील भएर लागेका पत्रकारहरूको सहभागिता थियो । उनीहरूले श्रमजीवी पत्रकारको हक हितको लागि खबरदारी गर्न मोर्चालाई आग्रह गरेका छन् । 

कार्यक्रममा डा. सुरेश आचार्य (पूर्व सभापति, पत्रकार महासङ्घ) विष्णु निष्ठुरी (पूर्व सभापति, पत्रकार पत्रकार महासङ्घ), राम प्र​साद दाहाल (शुद्धिकरण समिति सदस्य तथा पूर्व सचिव) पुनम पौडेल (टेलिभिजन पत्रकार)आदि पनि वक्ता भएको निमन्त्रणा पत्र भए पनि निष्ठुर, दाहाल र पौडेल उपस्थित थिएनन् l पत्रकारहरू अनावश्यक राजनीतिक हस्तक्षेपमा परेको अधिकांश वक्ताहरूको गुनासो थियो