असार, १८काठमाडौं । कांग्रेस र एमालेबीच केपी ओली दुई वर्ष प्रधानमन्त्री, शेरबहादुर देउवा बाँकी अवधि चुनावसम्म प्रधानमन्त्री बन्ने समझदारी करिब करिब फाइनल चरणमा पुगेको बताइन्छ ।

सुरुको चरण एमाले अध्यक्ष ओलीले, दोस्रो चरणमा कांग्रेस सभापति देउवाले सरकार चलाउने सहमति नजिक दुई नेताहरू ओली र देउवा पुगेका छन् l  संविधानको धारा ७६.२ अन्तर्गतकै सरकार बनाउन चाहेका यी दुई नेताले संविधानको व्याख्याबारे राष्ट्रपति कार्यालयको स्पष्टता पनि लिइसकेका र राष्ट्रपति फेवरमा रहेको सङ्केत पनि प्राप्त गरिसकेका छन् l 

 एमाले महासचिव शंकर पोखरेल र कांग्रेस प्रमुख सचेतक रमेश लेखकसहितको छलफलमा यो समझदारीको प्रारम्भिक खाका तयार भएको हो । खाका तयार गरिसकेर नेताहरू सभापति देउवा र अध्यक्ष ओली महाराजगन्जस्थित  एक व्यवसायीको निजी निवासमा बसेर छलफल गरेका थिए l गत शनिबार देउवा सपत्नी ओली निवास बालकोट पुगेर बिताएका तीन घण्टाले नै सरकार परिवर्तन बारे तरङ्ग सिर्जना गरेको थियो l 

 सहमतिको प्रारम्भिक खाका अनुसार  प्रदेश सरकारहरूमा पनि ३/३ वटा सरकार भाग लगाउने भएका छन् । मधेश प्रदेशमा चाहिँ मधेशकेन्द्रित दलकै नेतृत्वलाई सरकार बनाउन दिने परिस्थति बन्ने उनीहरूको सहमतिको निचोड रहेको बुझिएको छ l 

  संविधान संशोधनका लागि प्रारम्भिक सहमतिको खाका तयार गरेर जनतालाई नयाँ सरकार बनाउने औचित्य बताउने पनि दलहरूको सहमतीय खाकामा डिजाइन गरिएको छ , जसमा समानुपातिक प्रतिनिधित्वका आधारमा चुनिएर आउने सांसदलाई राष्ट्रिय सभा लैजाने, उपराष्ट्रपतिलाई सभाको अध्यक्ष बनाउनेलागायत बुँदा हरू उल्लेख छन् l 

प्रतिनिधिसभा र राष्ट्रिय सभा दुवैको सिट संख्याबारे पनि पुनर्विचार गर्न सकिने सम्भावनाबारे समेत छलफल भएको छ । पालिकाको संख्या ७५३ बाट घटाएर वडाको संख्या वृद्धि गर्न संविधान संशोधन प्रस्तावमा सहमति गर्ने सम्भावना छ । संविधान पुनरावलोकन गर्न पूर्वप्रधानन्यायाधीश कल्याण श्रेष्ठको नेतृत्वमा समिति बनाउने उनीहरूले तयारी गरेका छन् ।

प्रदेश सभामा समानुपातिक तर्फको प्रावधान हटाएर प्रत्यक्ष निर्वाचितमात्रै राख्ने विकल्पबारे दुई दलका नेताहरू बीच छलफल भएको छ । देउवा र ओलीले हस्ताक्षर गरेर सहमतिलाई पूर्णता दिने गरी हाललाई ड्राफ्ट गरी तयारी हालतमा राखिएको ड्राफ्ट आफ्ना पार्टीका नेताहरूसँग थप छलफल गरि परिस्थति परिपक्व भएपछि आधिकारिक रूपमा सार्वजनिक गरिने कुरा एमाले कांग्रेस सम्बद्ध विशेष स्रोतले दाबी गरेका छन् l 

देशको स्थति गम्भीर मोडमा पुगेको बेला कांग्रेस र कम्युनिष्ट विशेष गरी एमाले कांग्रेस मिलेर सरकार बनाएको, संविधान बनाएको र आन्दोलन गरेको नजिर प्रस्तुत गर्दै अहिले पुन सत्ता समीकरणको सान्दर्भिकता प्रष्ट पार्न दलहरू रणनीति बनाउने गरी सहमतिमा सक्रिय भएका छन् l प्रचण्डले देखाउने लोभ र लालचमा एक अर्को दल अब नफस्ने प्रतिबद्धता पनि ओली र देउवाले एकअर्कालाई दोस्रो तहका नेता साक्षी राखेर गरेका थिए र विश्वासको वातावरण बनाउँदै लगेर पार्टी पङ्क्तिलाई कन्भिन्स गर्ने सल्लाह पनि नेताहरू बिच भएको जानकारी वार्तामा संलग्न नेताहरूले दिएका छन् l