नेपाल पत्रकार महासंघको अगामी नेतृत्वको चयनका लागि चुनावी सरगर्मी बढेको छ । 

नेतृत्व चयनका लागि विभिन्न तरिकाले कसरत भइरहेको छ । अहिलेको कसरत हेर्दा नेपाल प्रेस युनियन र प्रेस चौतारीको नेतृत्वमा दुइ गठबन्धन बन्ने तयारी तिब्र पारिएको छ । यसको विकल्पको रूपमा तीन वटा ठूला संगठन चौतारी, युनियन र प्रेस सेन्टरले भागबण्डाका आधारमा सिंगो गठबन्धन पनि बन्न सक्ने गतिबिधि पनि भइरहेको स्रेत बताउँछ ।  यस्तो गठबन्धन बनेमा तीनवटै संगठनभित्रका केही बागी उम्मेद्वारहरूले अन्य साना संगठन र स्वतन्त्र पत्रकारसहितको अर्को गठबन्धन बनाएर मैदानमा आउने निश्चितप्राय छ ।  

चुनावी सरगर्मीको माहोल हेर्दा नेपाल प्रेस युनियनमा अहिलेका बरिष्ठ उपाध्यक्ष रमेश विष्टले महासंघको आगामी अध्यक्षका लागि आफूलाई बलियो दाबेदारका रूपमा प्रस्तुत गरिरहेका छन् । बिष्टबाहेक युनियनभित्र रामजी दाहाल पनि आकांक्षी देखिएका छन् ।  

प्रेस युनियनले प्रेस सेन्टर र चौतारीसँग सहकार्य गरेको स्थितिमा बरिष्ठ उपाध्यक्ष बिष्ट श्रमजिवी पत्रकार संघ नेपालका अध्यक्ष जन्मदेव जैसीसँग सहकार्य गरी आफ्नो नेतृत्वमा नयाँ टिम घोषणा गर्ने गरी तयारी गरिरहेको स्रोतले बताएको छ । यता प्रेस सेन्टरको तर्फबाट श्रमजिवी पत्रकार संघ नेपालका अध्यक्ष जैसीले आफ्नो बलियो दाबेदारी प्रस्तुत गरिरहेका छन् । जैसीबाहेक प्रेस सेन्टरमा बलराम थापा, खिलबहादुर भण्डारीलगायतका पत्रकारहरू आकांक्षी देखिएका छन् ।

यसैगरी एमाले निकट संगठन चौतारीको तर्फबाट निर्मला शर्माको सम्भावना बलियो देखिएको छ । भने चौतारीका अध्यक्ष गणेश बस्नेत र अखण्ड भण्डारी पनि आकांक्षी देखिएका छन् ।

महासंघको सदस्यता विवाद चर्किएपछि चुनावको मिति भने केही समयपछि सर्ने निश्चित भएको छ ।  यही जेठ २६ गते हुने भनिएको महासंघको चुनाव सर्ने भएपछि सम्भावित उम्मेदवारहरू आफ्नो तयारी अझैं ब्यापक बढाउन थालेका छन् ।