काठमाडौ 

राष्ट्रिय संयुक्त सङ्घर्ष समितिले विभिन्न १८ बुँदे मागसहित काठमाडौँको कलङ्कीमा सामूहिक सत्याग्रह सुरु गरेका छन् । सत्याग्रहको आज पाँचौं दिन हो l 

‘स्वदेशमै काम गरेर खान दे, उद्योगी व्यवसायी तथा आम नागरिकलाई बाँच्न दे’ भन्ने मूल नारासहित बैशाख २४गतेदेखि सुरु भएको सत्याग्रह माग सम्बोधन नभएसम्म जारी रहने दृढता आन्दोलनकारी पक्षले व्यक्त गरेको छ ।

स्वदेशमै रोजगारीको ग्यारेन्टी हुनुपर्ने , बढ्दो महँगी नियन्त्रण हुनुपर्ने , बैङ्किङ कर्जा ब्याजदर अधिकतम ७ प्रतिशत हुनुपर्ने, कालोसूची वा लिलामीमा गएकालाई तत्कालै बन्द गरी न्यूनतम २ वर्षको अवधि थप गर्नुपर्ने, योजना सम्पन्न भएका निर्माण व्यवसायीलाई अविलम्ब भुक्तानी गर्नुपर्ने माग राखेका छन् ।

त्यस्तै सनातन राष्ट्र नेपाल घोषणा गर्नुपर्ने, यातायात क्षेत्रमा लगानीकर्ताको संरक्षण तथा पूर्ण बीमा व्यवस्था हुनुपर्ने, एम्बुलेन्स, तीर्थयात्री, पर्यटकीय सवारी, दिल्ली काठमाडौँ बस सेवाबाहेक सबै प्रकारका भारतीय मालवाहक सवारी पूर्णरूपमा बन्द हुनुपर्नेलगायत माग उनीहरूको छ । त्यस्तै मिटर ब्याजीलाई कानुन अनुसारको व्याज दिलाई बाँकी रकम साँवाबाट घटाई कानुन अनुसार ठगी मुद्दा लगाउनुपर्ने, सरकारले कृषिजन्य उपज खरिद सुनिश्चित गर्नुपर्ने, प्रादेशिक संरचना पुनर्विचार गर्दै स्थानीय तहलाई अधिकार सम्पन्न गराउनुपर्ने लगायतका माग रहेको गोविन्द बिष्टले जानकारी दिएका छन ।

 सरकारले आफ्ना माग पुरा नगरेसम्म सत्याग्रह जारी रहनेकुरामा आन्दोलनकारी दृढ छन । आज सिंगो देश संकटमा परेको बेला सामूहिक रूपमा सङ्घर्ष गर्नुपर्ने भएको हुँदा हामी सबैले पार्टी, जाति, क्षेत्र  लिङ्गभन्दा माथि उठेर संयुक्त रूपमा सङ्घर्ष गरेका छौ । यो आम नागरिकको चिन्ता हो सबैले आआफ्नो ठाउँबाट आफ्नो समस्या र पीडा समाधान गर्न यो आन्दोलनलाई सघाउन अनुरोध गरेका छन् । अनशनको चौथो दिन अर्धनग्न भएर सयौं बाइकहरू  कलंकीबाट सुरु गरि गंगबु ,चाबहिल,गौशला ,भृकुटीमण्डप ,त्रिपुरेश्वर हुदै कलंकी सत्याग्रह भएको ठाउँमा आएर यो सरकारले आर्थिक, सामाजिक ,भाषिक र सांस्कृतिकरूपमा हामी नाङ्गो भएको हुँदा  हाम्रो वास्तविक परिचय देखाएर सांकेतिक  नाङ्गो र्‍याली गरेको बताए ।

‘सरकारले हाम्रा माग समयमै सम्बोधन नगरेमा आन्दोलनका थप कार्यक्रमहरू समेत सार्वजनिक गर्छौं,’ उनले भने । हाल सामूहिक सत्याग्रह अन्तर्गत विभिन्न व्यक्ति तथा सङ्घसंस्थाका प्रतिनिधि समेत नौ जना सत्याग्रहमा छन् । उनीहरूको समर्थनमा दैनिक हजारौँको संख्यामा व्यवसायी तथा सर्वसाधारण उपस्थिति हुने गरेको बिष्टले जानकारी दिए ।

आमरण अनशनमा चन्द्रबहादुर थापा (सागर ) , बिन्दु थापा केसी , द्रोण सुवेदी , सुवास श्रेष्ठ , हिमलाल पौडेल , इन्द्रबहादुर आलेमगर, प्रल्हाद पोख्रेल , शेरबहादुर साउद , पार्वती पुलामी आदि छन् l उनीहरू मध्ये केहीको स्वास्थ्य अवस्था खराब हुँदै गएको जानकारी पनि गोविन्द बिष्टले गराएका छन् l सरकारको तर्फबाट आजसम्म ४ दिन भइसक्दा कोही पनि आएको छैन र सत्यागार्हीको मागमा सरकार मौन बसेको छ l भर्खरै मानवाधिकार आयोगबाट स्थितिको अवलोकन गर्ने कार्य सम्पन्न भएको  छ l 

फोटो : गोविन्द बिष्ट