काठमाडौं, चैत २६

नेपाली कांग्रेसका सांसद प्रदीप पौडेलले उपप्रधानमन्त्री तथा गृहमन्त्री रवि लामिछानेमाथि सहकारी प्रकरणमा संसदीय छानबिन समिति बनाउनुपर्ने मागबाट कांग्रेस पछि नहटेको जानकारी दिएका छन् l 

 काठमाडौंमा सोमबार आयोजित नयाँ वर्षको शुभकामना आदानप्रदान कार्यक्रमलाई सम्बोधन गर्दै उनले नेपाली कांग्रेस छानबिन समिति निर्माण गर्ने अडानबाट पछि नहट्ने स्पष्ट पारे। उनले छानबिनका लागि निर्दोष छु भन्नेहरू छानबिन समिति बनाउन किन तयार नभएको भन्दै प्रतिप्रश्न गरेका छन् l सांसद पौडेलले सरकारको संयन्त्र विश्वसनीय नभएकै कारण यसअघिका प्रकरणहरूमा पनि संसदीय छानबिन समितिहरू बन्ने गरेको दृष्टान्त दिए l 

पौडेलले भने, ‘दोषी नभएको अवस्थामा छानबिन समिति बनाउन किन अफ्ठ्यारो ? कुनै पनि घटना विशेषको सत्यतथ्य खोजिनुपर्छ । प्रश्न उठ्दैमा र आरोपहरू  लाग्दैमा कोही दोषी हुन्छ भन्ने हुँदैन । तर आरोप लागिसकेपछि सत्यतथ्य छानबिन गर्ने काम सरकारको हो ।’  

 सरकारले सुशासन कायम गर्न सुशासनका सबै मान्यतालाई अंगिकार गर्नुपर्ने बताउँदै उनले भ्रष्टाचार अन्त्य गर्न र सुशासन कायम गर्न आजसम्म भएका अनियमितताको छानबिन अपरिहार्य भएको उल्लेख गरे।

कांग्रेस नेता पौडेलले भने, ‘कुनै पनि घटना विशेषको तथ्यसत्य के हो भन्ने खोजिनुपर्छ। आरोप लागिसकेपछि त्यसको छानबिन गर्ने, सत्यतथ्य बाहिर ल्याउने काम सरकारको हो। सरकारले सुशासन कायम गर्ने हो भने सुशासनका सबै मान्यतालाई अंगिकार गरेको हुनुपर्छ। प्रश्न आफूलाई उठ्यो, त्यो कुराको वास्ता नगर्ने र अरूलाई प्रश्न उठाउने कुरा मात्रै सरकारमा बसेर स्वभाविक हुन सक्दैन।’

फाइल फोटो