काठमाडौँ

अखाद्य रङयुक्त कटन क्यान्डी प्रयोग, उत्पादन तथा बिक्री र वितरणमा काठमाडौँ महानगरपालिकाले  निषेध गरेको छ l  महानगरपालिका क्षेत्रभित्र बिक्री गरिँदै आएको कटन क्यान्डीको खाद्य गुणस्तर परीक्षण गर्दा त्यसमा अखाद्य तत्त्व मिसाइएको पाइएकोले त्यसले आम उपभोक्ताको स्वास्थ्यमा असर गरेको महानगरले जनाएको छ । अखाद्य रङयुक्त कटन क्यान्डी बारे यसको गुणस्तर सम्बन्धमा पहिले देखि नै प्रश्न उठ्दै आएको थियो l 

 शनिबार एक सार्वजनिक सूचना जारी गर्दै खाद्य प्रविधि तथा गुण नियन्त्रण डिभिजन कार्यालयमा नमुना परीक्षण गराउँदा प्रयोगशालाको विश्लेषण प्रतिवेदनमा क्यान्डीमा अखाद्य रङ ’रोडामाइन बी’पाइएको भन्दै महानगरले क्यान्डीको बिक्रीमा रोक लगाएको छ । 

 महानगरले आफ्नो क्षेत्रभित्र क्यान्डीको प्रयोग तथा बिक्री वितरण नगर्न अनुरोध गर्दै चेतावनीयुक्त जरिवानाको समेत उल्लेख गरेको छ l  

 “अखाद्य वस्तुले आम उपभोक्ताको स्वास्थ्यमा गम्भीर असर पुर्‍याउने भएकोले महानगरपालिका क्षेत्रभित्र यस्ता अखाद्य रङयुक्त वस्तु प्रयोग तथा बिक्री वितरण नगर्न÷नगराउन अनुरोध गर्दछौं,” महानगरको सूचनामा उल्लेख छ, “यदि काठमाडौँ महानगरपालिका क्षेत्रभित्र अखाद्य वस्तु उत्पादन, बिक्री वितरण गरेको पाइएमा पाँच हजारदेखि दुई लाख रुपैयाँसम्म जरिबाना हुने समेत जानकारी गराइन्छ,” महानगरले जारी गरेको सूचनामा उल्लेख छ ।

काठमाडौँ महानगरको सूचना :

स्मरणीय : अखाद्य रङयुक्त कटन क्यान्डी जस्तै अन्य खाद्यवस्तु जुन म्याद गुज्रेर र गुणस्तर नभएर अखाद्यवस्तुमा परिणत भएका छन् तिनीहरूको चेक जाँच गरी जनताको स्वास्थ्यमा प्रतिकूल असर पर्ने कार्य गर्न देशभर प्रतिबन्ध लगाइनु पर्छ l  akabarey.com