काठमाडौं, पुस,२८

 समालोचक तथा वामपन्थी चिन्तक प्राध्यापक डाक्टर ताराकान्त पाण्डेयको बस दुर्घटनामा मृत्यु भएको छ ।नेपालगञ्जबाट काठमाडौं आउने क्रममा दाङस्थित राप्ती नदीमा बस् खस्दा मारिएका १२ जना मध्ये एक थिए ताराकान्त पाण्डेय l 

प्रगतिवादी साहित्यमा समर्पित उनी इच्छुक सांस्कृतिक प्रतिष्ठानका अध्यक्ष समेत थिए । हाल उनी मोहन वैद्य किरण नेतृत्वको क्रान्तिकारी कम्युनिष्ट पार्टीका केन्द्रीय सल्लाहकार तथा स्कुल विभाग सदस्य हुन् l पार्टीको  कैलालीमा आयोजना गरेको स्कुलिङ कार्यक्रममा सहभागी भएर फर्किने क्रममा उनको बस दुर्घटनामा परी निधन भएको हो ।

२०१७ असोज ८ गते रुपन्देहीमा पाण्डेयको जन्म भएको थियो, २०३६ सालदेखि नेपाली साहित्यमा निरन्तर सकृय थिए । क्रान्तिकारी कम्युनिष्ट पार्टीका सदस्य पाण्डेयको कम्युनिष्ट नाम कमरेड सञ्जय थियो l  

उनका भूमिका र मूल्याङ्कन (२०५३), प्रगतिवाद र कविता (२०५६), देवकोटाको व्यङ्ग्य व्यक्तित्व (२०५८), अर्थभ्रान्तिको उत्तर चेतनाका विरुद्ध (२०६७), अर्थको आनन्द (२०६८), समय र सिर्जना (२०६८), मार्क्सवाद, सांस्कृतिक अध्ययन र साहित्यको समाजशास्त्र (२०७३ ) जस्ता समालोचना प्रधान कृतिहरु प्रकाशित छन् l 

पाण्डेयले  ‘आलोचना’, ‘कलम’ जस्ता साहित्यिक पत्रिकासमेत सम्पादन गरेका थिए भने योजना साप्ताहिकका सम्पादक रहेका थिए l सांस्कृतिक आन्दोलनका अगुवा, साहित्यको समाजशास्त्रका अध्येता अध्यापक पाण्डे दलित विषय लेखनका पनि ज्ञाता थिए l त्रिवि मानविकी तथा सामाजिक शास्त्र सङ्कायका पूर्व सहायक डीन रहीसकेका पाण्डेयले विसं २०५७ सालको पारिजात सिर्जन पुरस्कार पाएका थिए । त्रिभुवन विश्वविद्यालयमा एमफिल पिएचडीका शोधार्थीहरूका गुरु प्राडा ताराकान्त अन्यन्तै साधरण शालीन र भद्र प्राध्यापका रूपमा विद्यार्थीहरू माझ चिनिएका थिए l मार्क्सवादी सौन्दर्य चिन्तकको परिचय बनाएका पाण्डेय वामपन्थी खेमामा पनि उत्तिकै परिचित र सहृदयी थिए l

प्रा.डा. रमेशप्रसाद भट्टराईले पाण्डेयको निधनले नेपाली बौद्धिक जगतको र विचारधारात्मक निर्मितिको लागि र समालोचनात्मक जगतको निम्ति अपूरणीय क्षति भएको उल्लेख गरेका छन् l  मृदुभाषी सरल र सविनय स्वभावका पाण्डेय मार्क्सवादी आचरण र व्यवहारका उदाहरण पनि थिए l