शर्मिला कार्की ' शरु'  

                   १

तात्तो न छारोका चल्छन् आन्दोलन हिजोआज             

देश चैं रसातलमा पुगेको छ झन् झन् हिजोआज 

भोट दिने बेलामा चैं "राम्रो" होइन "हाम्रो" हेर्छन्

"...सक्यो दैलो देख्यो" विरोध गर्छन् हिजोआज !

                    २

दिगो सुनाम चल्छ भने अनेक कष्ट खप्नुपर्छ

भक्ति पाउनलाई पनि त ईश्वरको नाम जप्नुपर्छ

रुखमा बस्ने कागले पनि जीवन /वंश धान्नलाई

गुँड बनाउँदा/मर्मत गर्दा,सिन्का /झिंझा थप्नुपर्छ!

                    ३

सफल हुन चाहनेले जे जे गर्न आँट्नुपर्छ 

उस्तै परे आफ्नो निर्णय आफैं पनि काट्नुपर्छ

शङ्का लागे लङ्का पनि डढ्नसक्छ भन्ने बुझी 

विश्वासपात्रलाई समेत कुनै बेला ढाँट्नुपर्छ ।

                   ४ 

अन्यौलमा छ गुरुवर्ग , हरेक शिष्य अन्यौल छ

हरेक विभाग र हरेक क्षेत्रको परिदृष्य अन्यौल छ

वर्तमानको तीन पुस्ता नै विदेश पलायन भएपछि 

अनिश्चित छ , यो मुलुकको भविष्य अन्योल छ ।

                    ५

ओइलाएको फूलले निराश हुँदै भन्छ जीवन छोटो छ

कला घटेको जूनले बाँकी दिन गन्छ जीवन छोटो छ

भूकम्प ,बाढी,दुर्घटना ,युद्धहरू सम्झिएर म झस्किन्छु

नियतिले कहिले कस्को चिहान खन्छ,जीवन छोटो छ !