सुरेश भट्ट आश्रिन, दोहा

नेपालीहरूको महान दोस्रो ठूलो रङ्गीन पर्व तिहारले गाउँ, शहर र विदेशमा बस्ने नेपालीहरूलाई छोपिसकेको छ । तिहार फूलै-फूलको पर्व पनि हो । व्यावसायिक फूलखेती गर्दै आएका फूल किसानलाई अहिले फूल टिप्न भ्याइ नभ्याइ छ ।

नेपालमै फूल उत्पादनको सम्भावना भए पनि तिहारका समयमा भारत र अन्य देशबाट प्राकृतिक फूल र कृत्रिम फूल आयात हुन छाडेको छैन । चाडबाडमा प्रयोग हुने मखमली र सयपत्री  फूल खेतीलाई थप विस्तार गर्न र कृषकलाई फूलमा आत्मनिर्भर बनाउन पहिलो पटक नेपालबाट व्यावसायिकरूपमा सुदान फ्लावरले कतारमा सयपत्री र मखमली फूल भित्र्याएको छ ।

विदेशमा पनि फूलको बजार र आम्दानीको सम्भावना प्रशस्तै भएको र नेपाल बाहिरको मिनी नेपालमा बस्ने नेपालीलाई नेपाली फूल प्रयोगमा ल्याउन लक्षित गर्दै स्वदेशी उत्पादनलाई विदेशी बजारमा पुर्‍याउन तनहुँ जिल्लाको आँबुखैरेनी गाउँपालिकामा सामूहिक व्यावसायिक फूलखेती गरेका  याञ्चोक आमा समूह र आँधीमूल आमा समूहले मित्रता मा.वि. परिसरमा करिब २६ रोपनी क्षेत्रफलमा गरेको व्यावसायिक फूल खेतीलाई अन्तर्राष्ट्रियकरण गर्दै कतारको बजारमा ल्याइपुर्‍याएको अम्बिका पौडेल बताउँछन् । 

दोहाको रिजेन्सी मार्केटमा रहेको सुदान फ्लावर पसलले दीपावलीको दिनबाट बिक्री वितरण सुरू हुने गरी सयपत्री फूल कतारमा भित्र्याएको हो । फूलको साइजअनुसार १ मिटरको मालाको बजार मूल्य २५ देखि ३० रियाल कायम गरिएको सुदान फ्लावरका मालिक कविन्द्र कँडेलले जानकारी दिएका छन् l 

तिहारलाई मात्र लक्षित नभएर अन्य समयमा समेत नेपाली फूललाई निरन्तरता दिने उनको योजना छ । उनले भने, ‘कतारमा हुने विभिन्न कार्यक्रममा समेत फूलको प्रयोग गर्ने हो भने नेपालमा उत्पादन भएका फूल र फूलखेती किसानलाई टेवा पुग्ने र नेपालमै बस्ने दीर्घकालिन योजना किसानहरूले बुन्ने थिए विस्थापित भएर विदेश हिड्न पर्ने थिएन ।'कँडेल भन्छन् l