साउन,९ काठमाडौं: युवा सामाजिक अभियन्ता किरण विकले रुपन्देही निर्वाचन क्षेत्र नम्बर ३ बाट निर्दलीय  उम्मेदवारको रूपमा आफूलाई प्रस्तुत गरेका छन् । काठमाडौँको भृकुटीमण्डपमा आयोजित पत्रकार सम्मेलन आयोजना गरी विकले आफ्नो उम्मेदवारी घोषणा गरेका हुन् । कार्तिकमा १७ मा  घोषित उप चुनावको स्वागत गर्दै किरण विकले आफ्नो उमेद्वारी दाबी गरेका छन् l 

आफूलाई सामाजिक उदारवादी र समावेशी मूल्य-मान्यताको समर्थकका रूपमा प्रस्तुत गर्दै विकले भैरहवालाई ‘क्रिप्टो भ्याली’बनाउने योजना र लक्ष्य अगाडि सारेका छन् l 

विगत ११ वर्षदेखि राजनीति, फिल्म मेकिङ र लेखनमा सक्रिय रहेका विकले उदार लोकतन्त्र र मिश्रित अर्थतन्त्रलाई आफ्नो राजनीतिक दर्शनको रूपमा चित्रण गरे l  खुला समाजको समर्थन गर्दै महिला, मधेसी, जनजाति, मुस्लिम, दलित, थारु, अपाङ्ग लगायतका अल्पसंख्यक तथा सीमान्तकृत समुदायको हकहित र एलजीबिटीआईक्युए प्लसको हक  अधिकारको पक्षमा वकालत गर्ने प्रतिबद्धता पनि किरणको रहेको छ l 

विकले भैरहवालाई क्रिप्टो भ्याली घोषणा गर्ने, संसदमा क्रिप्टोकरेन्सीलाई कानुनी मान्यता दिन पैरवी गर्ने, र क्रिप्टो मुद्दामा फसेका युवाहरूलाई न्याय दिलाउन जेल वा थुनामा रहेकालाई रिहा गर्न तथा मुद्दा रद्द गर्न पहल गर्ने उल्लेख गरेका छन् ।

भैरहवालाई आर्थिक राजधानी र अन्तर्राष्ट्रिय मनोरञ्जन पर्यटकीय सहरका रूपमा विकास गर्ने, लुम्बिनी महानगरको अवधारणालाई कार्यान्वयन गर्ने, र व्यवस्थित सहरीकरण गर्ने योजना पनि प्रस्तुत गरे। जलवायु परिवर्तनको असरबाट भैरहवालाई जोगाउने, संवैधानिक अदालतको छुट्टै व्यवस्था गर्ने, रुपन्देही ३ लाई आधुनिक कृषिको केन्द्र बनाउने र शैक्षिक हबका रूपमा स्थापित गर्ने पनि उनका एजेन्डाहरूमा समावेश छन् ।

लागुऔषधसम्बन्धी कडा कानुनलाई नरम बनाउँदै सेवनकर्तालाई सुधारात्मक रिमेडीमा जोड दिने कानुन निर्माण गर्ने विषयलाई पनि किरण विकले प्राथमिकतामा राखेका छन् l  रुपन्देही ३ लाई गुणस्तरीय तथा सस्तो स्वास्थ्य सेवा प्रवाह गर्ने सहर बनाउने प्रतिबद्धता पनि विकले  जारी गरेको प्रेस विज्ञप्तिमा उल्लेख छ l 

को हुन् किरण विक ? 

प्राय: काठमाडौँका हरेक समाजिक न्यायको आन्दोलनमा सक्रिय रहने किरण विक सहरी योजनामा स्नातकोत्तर, कानुनमा स्नातक (एलएलबी) र फिल्म मेकिङमा स्नातक गरेका ३१ वर्षीय युवा हुन् l  बुटवलका स्थायी बासिन्दा किरण विभिन्न पत्रपत्रिका मार्फत् आफ्नो विचार प्रवाह गरिरहन्छन् l कुनै पनि विषयलाई आलोचनात्मक ढङ्गले विश्लेषण गर्ने किरण क्रियटिभ माइन्ड भएका  सामाजिक संजालमा सक्रिय व्यक्ति पनि हुन् l केही विकास संस्थाहरूमा सदस्यका रूपमा पनि किरणको सक्रिय सहभागिता रहेको छ l कुनै पनि राष्ट्रिय विषय र इश्युमा किरण स्पष्ट र प्रभावकारी दृष्टिबोध प्रस्तुत  गर्न खप्पिस छन् l 

आफ्नो निर्दलीय उमेद्वारी घोषणा गर्दै भनेका छन् : 'धेरै साथीहरू ८४ कुरेर बसेका छन् l म नयाँ सँगै छु l म आफ्नो राजनीतिक एजेण्डासहित नयाँको पक्षमा छु l निर्दलीय अभियानमा जोडिएर, निर्दलीय अभियनमा मिसिएर, निर्दलीय अभियानमा गोलबन्द भएर जान चाहन्छु l मेरो उमेद्वारी त्यसैको लागि हो l' किरण विकले उल्लेख गरेका छन् l