काठमाडौं- राष्ट्रिय स्वतन्त्र पार्टीले पार्टी सभापति रवि लामिछानेको पक्षमा २४ लाख ५७ हजार ६१८ जनाले हस्ताक्षर गरेको जानकारी बिहीबार पत्रकार सम्मेलन गरेर दिएको छ l रास्वपाले सभापति लामिछानेमाथि  सरकारले राजनीतिक प्रतिशोध साँधेको भन्दै असार ७ गतेदेखि हस्ताक्षर अभियान सुरु गरेको थियो । रविको पक्षमा हस्ताक्षर गर्नेक्रम बढ्दो रहेको कारण २५ लाख हस्ताक्षर भरे भोलि नै पुग्ने रास्वपाका एक नेताले उत्साहित हुँदै बताएका छन् l 

पार्टी कार्यालयमा आयोजित पत्रकार सम्मेलनमा रास्वपाका नेता दीपक बोहराले हस्ताक्षर अभियानलाई अझै अगाडि बढाउने पार्टीको तयारी रहेको उल्लेख गर्दै  साउन ५ गतेबाट सभापतिको अपिल र हस्ताक्षर अभियान लिएर घरदैलो कार्यक्रम गर्ने पनि उनले बताए । 

अब केन्द्रीय कार्यालय, प्रदेश, सीमा नाका र विदेशमा समेत बुथ राखेर अभियान चलाउने बताए । उनले अहिलेसम्म अभियानको लागि सहयोग रकम ४६ लाख १२ हजार ६३७ रुपैयाँ संकलन भएको बताए।

अभियानका संयोजक समेत रहेका बोहराले सभापतिको अपिल र हस्ताक्षर फारम छाप्नेलगायत अभियानका लागि अहिलेसम्म ५९ लाख ६८ हजार खर्च भइसकेको घाटा बजेटको जानकारी पनि दिएका थिए l