काठमाडौं: बुधबार वैशाख, ३१, प्रेस काउन्सिल नेपालले आयोजना गरेको 'आमसञ्चार माध्यममा दलितका सरोकार' विषयक एक दिवसीय कार्यशालामा बोल्ने वक्ताहरूले दलित मैत्री मिडिया आवश्यक रहेको बताउँदै सञ्चार माध्यममा दलितका एजेण्डालाई विशेष प्राथमिकता दिनुपर्नेमा जोड दिएका छन् l कार्यक्रममा दुई जनाले कार्यपत्र प्रस्तुत गरेका थिए l कार्यक्रम प्रेस काउन्सिल नेपालको सभाहल संचारग्राम सिनामंगलमा भएको थियो l 

दलित अध्येता मेघेन्द्र विश्वकर्माले 'आमसञ्चार माध्यममा दलितको (अ) समावेशिताको सवालः समस्या राज्यको नीति कि नियत ?' विषयक कार्यपत्र प्रस्तुत गर्दै नेपालका आमसञ्चार माध्यमहरू,व्यवसायिक संघसंगठनहरू र नियामक निकाय नै चरम असमावेशी रहेको कुरा तथ्यांकसहित प्रस्तुत गरेका थिए ।

पत्रकार तथा मधुपर्क मासिकका प्रधान सम्पादक, लेखक  त्रिभुवनचन्द्र वाग्लेले 'समावेशी आमसञ्चारको परिकल्पनाः नीति र कार्यान्वयन बीचको खाडलले उठाएका प्रश्नहरू' विषयक कार्पपत्र प्रस्तुत गर्दै सञ्चार माध्यममा दलित सहभागिता अपरिहार्य रहेको उलेल्ख गरेका थिए l 

कार्यक्रममा प्रेस काउन्सिल नेपालका अध्यक्ष बालकृष्ण बस्नेतले आमसञ्चार माध्यममा दलितको भौतिक सहभागिता र विषयवस्तुको समावेश गर्नुपर्ने आवश्यक्तामा जोड दिए । समावेशी आमसञ्चार माध्यम वर्तमान् युगको माग रहेको बताउँदै उनले दलित तथा सीमान्तकृत वर्ग समुदायलाई लक्षित गरी प्राथमिकतापूर्वक कार्यक्रमहरु सञ्चालन गर्न आवश्यक रहेको धारणा व्यक्त गरे । उनले पत्रकारको असली परिचय र पहिचान निर्माण गर्नुपर्ने ज्वलन्त खाँचोमा ध्यानाकर्षण गराएका थिए l समाजमा पत्रकार को हो ? को होइन भनेर उठेको प्रश्नको जवाफ पत्रकार स्वयंको कर्मले दिनुपर्ने कुरामा अध्यक्ष बस्नेतको जोड थियो l 

नेपाल पत्रकार महासंघका निवर्तमान् अध्यक्ष विपुल पोखरेलले सामाजिक समावेशीकरण अपरिहार्य रहेको बताउँदै नीतिगत व्यवस्थाले विस्तारै कार्यान्वयनको प्रकृया समात्दै अघि बढिरहेको धारणा व्यक्त गरे ।

संविधानसभा सदस्य तथा राष्ट्रिय दलित पत्रकार संघका अध्यक्ष विनोद पहाडीले आमसञ्चार माध्यममा दलित पत्रकारहरूको सहभागिता वृद्धि र दलितका मुद्दालाई पूर्ण रुपमा स्थान दिन आवश्यक रहेको तर्क गर्दै पत्रकारितामा समावेशिताको ऐतिहासिक विवरण सुनाएका थिए ।

त्यसैगरी क्रियाशील दलित पत्रकार संघका अध्यक्ष पवित्रा सुनारले नीजि सञ्चारमाध्यमहरू मात्रै नभै राज्य मातहतका सञ्चार माध्यमहरूमा दलित सहभागिता र विषयवस्तुको उठान कम भएकोमा सचेत गराउँदै त्यसतर्फ राज्यको नियामक निकाय प्रेस काउन्सिल नेपालको ध्यान जान जरुरी रहेको धारणा राखेकी थिइन्  ।

अधिकारकर्मी जीतेन्द्र पासवानले आमसञ्चार माध्यमहरुले मधेशी दलित र मधेशी दलित पत्रकारलाई केन्द्रमा नराखेको बताउँदै त्यसतर्फ समयमै ध्यान जान जरुरी रहेको धारणा व्यक्त गरे ।

कार्यक्रममा नेपाल पत्रकार महासंघका केन्द्रिय सदस्य रिता बुढाथोकी, रेडियो नेपालका पत्रकार भीम घिमिरे, नेपाल टेलिभिजनका पत्रकार चक्रमान विश्वकर्मा, पत्रकार सविता रसाईली, दलित कर्मचारी संगठनका अध्यक्ष जयबहादुर विश्वकर्मालगायत तीन दर्जनभन्दा धेरै पत्रकार, अधिकारकर्मी र सरोकारवालाहरूले कार्यपत्र माथिको विमर्शमा भाग लिएका थिए l 

कार्यक्रममा दलित समुदायको विषय र  समावेशिताको  मुद्दालाई सञ्चार माध्यमले संवेदनशील भएर  लिनुपर्ने र उचित स्थान दिएर राष्ट्रको मूल प्रवाहमा प्रवाहीकरण गर्नु पर्नेमा सरोकारवालाहरूको जोड थियो l