काठमाडौँ - नेकपा एमालेका केन्द्रीय सदस्य केशव स्थापित नेकपा एमालेबाट अलग भएका छन् l अलग भए पनि केही नयाँ काम गर्ने र चर्चा कमाउने उनको मनसुवा रहेको पाइन्छ त्यसैले केही गर्दैछु त्यो विस्तारै थाहा हुन्छ भनेर आफूले गर्न लागेको कामको रहस्य केशवले खोलेका छैनन् l केशव चर्चा र रहस्यको उत्कर्षमा रहने पात्र हुन् l विवाद र अस्थीर राजनीति केशवको जीवनका दुई समानान्तर रेखा भएर आएका देखिन्छन् l  उनका बारे भविष्यवाणी गर्न मुश्किल  हुन्छ l

केशव काठमाडौँको मेयर हुँदा नाम कमाएका मान्छे हुन् l त्यतिबेला केही काम उनले राम्रो गरेका थिए l केशव भिजनरी छन् सपना देखाउन खप्पिस तर यिनको राजनीतिक स्थायित्वमा जहिल्यै गडबडी छ l चंचल छन् l मुख खुब चलाउँछन् l स्थापितले फेरि सम्भवत : चौथो पटक एमाले छोडेको केशवको राजनीतिक नालीबेली हेरौं :

केपी ओली पछि युवा संघको दोस्रो अध्यक्ष बनेका काठमाडौंका रैथाने केशव स्थापित २०४३ सालको काठमाडौं नगरपञ्चायतको चुनावमा तत्कालीन नेकपा (माले)बाट उपप्रधानपञ्चको उम्मेदवार बनेका थिए ।२०४७ सालमा नेकपा एमालेको भातृ संगठन प्रजातान्त्रिक राष्ट्रिय युवा संघको संस्थापक अध्यक्ष केपी शर्मा ओली बन्दा केशव स्थापित महासचिव थिए ।' २०५० को काठमाडौँमा भएको उपनिर्वाचनमा विद्या भण्डारीको सेतो साडीमा एमाले आफैले रातो मसी छरी दिएर कांग्रेसले यस्तो गर्या भनेर पर्चार गर्दै हामीले विद्यालाई जिताएका हौ' भनेर खुलेआम भन्ने स्थापित काठमान्डौ एमालेका कुनै बेलाका हस्ती थिए l

स्थापितले २०५१ सालमा पहिलो पटक राष्ट्रिय खेलकुद परिषद (राखेप)को सदस्य सचिव पदमा राजनीतिक नियुक्त लिएर एक वर्ष काम गरे ।२०५४ सालमा नेकपा एमालेबाट काठमाडौं महानगरपालिकाको मेयरमा निर्वाचित भए । ‘मेरो पौरख, मेरो गौरव, मेरो काठमाडौं’ भन्ने नारा उनैको पालामा ल्याइएको थियो । उनी मेयर भएकै बेला पशुपति, माइतीघर, तीनकुने लगायतका ठाउँमा निर्माण भएका अव्यवस्थित घर-टहराहरू भत्काइएको थियो ।एमाले,माले विभाजन हुँदा मालेमा लागेका स्थापित तत्कालीन अवस्थामा सांसदहरूलाई सुरा सुन्दरी र ब्लु फ्लिम देखाउने व्यक्ति भनेर पनि चर्चित छन् l एमाले मालेको एकता सँगै २०५९ सालमा एमाले फर्किए  l मेयर हुँदा दुई महिला माथि यौन दुर्व्यहार गरेको आरोप पनि केशबको थाप्लोमा छ l

भावना राउत नामकी एक अभियानकर्मीले स्थानीय चुनाव ताका उनलाई लाग्दै आएको 'मिटू' आरोपबारे स्पष्ट पार्न भनेकी थिइन्। उनले जंगिँदै बहिनीको ‘फेस त नाइस छ तर थुतुनो भएन’ भनेपछि थप विवादमा आएका थिए । स्थानीय चुनावभर 'फेस त नाइस त थुतुनो भएन'भन्ने केशवको बोली प्रत्युत्पादक नै बन्यो l शायद भावनालाई फर्काएको उत्तर केशवको लागि महङ्गो नै परेको हुनुपर्छ किनकि उपमेयरमा एमाले उमेद्वार भारी मतान्तरमा विजयी बन्दा केशवको स्थान तेस्रो तिर झर्यो l 

 काठमाडौंको लोकप्रिय मेयरमा दरिएका स्थापित २०६१ माघमा भने तत्कालीन राजा ज्ञानेन्द्रले सत्ता हत्याएपछि काठमाडौंको मेयरमा मनोनीत भएर ‘टिके मेयर’को रूपमा आलोचित बने । आफ्नो कम्युनिष्ट पृष्ठभूमिलाई धुलोपिठो पारे l 

राजाको शासनकाल समाप्त भएपछि  उनी माओवादी बने र काठमाडौं उपत्यका विकास प्राधिकरणको प्रमुख आयुक्तमा नियुक्त भए । तर तत्कालीन प्रधानमन्त्री डा. बाबुराम भट्टराईले ‘डेट एक्सपायर्ड’ भन्दै ९ महिनामै पदबाट हटाए । त्यसपछि नेपालको सबभन्दा पुरानो राजनीतिक संगठन प्रजापरिषद्को अध्यक्ष बनेर राजनीतिमा सक्रिय हुन खोजे पनि सफल हुन् सकेनन् l प्रजापरिषदलाई यिनले पनि पुनर्जीवन दिन सकेनन् भने प्रजापरिषदले पनि यिनको राजनीतिलाई चम्काउन सक्ने कुरै भएन l 

संविधानसभाको दोस्रो निर्वाचनको बेला संघीय समाजवादी पार्टीमा लागेका उनी काठमाडौं क्षेत्र नं. ६ बाट उम्मेदवार बनेर करिब हजार भोटको मात्र हकदार बने जबकि २०५४ को स्थानीय निर्वाचनमा काठमाडौँको मेयर बन्दा ८४००० मत प्राप्त गरेर विजयी बनेका थिए l  

अन्ततः उनी एमालेमै फर्किएर २०७४ मा नेकपा एमालेबाट बागमती प्रदेश सभा सदस्य बने । एमालेले दोस्रोपटक काठमाडौंको मेयरको टिकट दिएपछि उनले प्रदेश सभा सदस्य पदबाट राजीनामा दिएर चुनाव लडे । तर स्वतन्त्र उम्मेदवार बालेन्द्र शाह (बालेन) मेयरमा निर्वाचित हुँदा उनी तेस्रो स्थानमा रहे ।

त्यसअघि बागमती प्रदेश (तत्कालीन ३ नम्बर प्रदेश)को भौतिक पूर्वाधार मन्त्रीसमेत बनेका उनलाई मुख्यमन्त्री डोरमणि पौडेलले बर्खास्त गरेका थिए । यसरी राजनीतिको अप डाउनमा केशवको अस्थीर राजनीतिक शैली जिम्बेवार बनेको देखिन्छ l गत स्थानीय चुनावमा एक लाख माथि भोट ल्याएर काठमाडौँको मेयर पुन जित्ने दावी गरेका केशव ३८११७ मत पाएर तेस्रो भए जबकि बालेन शाह ६१७६७ मत सहित विजयी बनेका थिए l पराजय पछि  एमाले पार्टी राजनीतिमा खासै सक्रिय थिएनन् स्थापित l विपासना,ध्यान, योग र  काल भैरवका तान्त्रिक नाच गर्ने एक मात्र व्यक्ति  राजनीतिका अस्थीर पात्र हुन् l एमालेको हिजो सोमबार बसेको सचिवालयको बैठकले केशव स्थापितलाई बिदा दिएको छ l  घडीको पेन्डुलम झैँ यताउता गरिरहने केशव विवादमा आएन भने केशव स्थापित नै हुँदैन भन्ने व्यक्ति अर्को कुन फण्डा लिएर राजनीतिमा देखिने हुन् ?

akabarey.com परीक्षण प्रसारणमा छ l