काठमाडौं, मङ्सिर ३० - नेपालको एकीकरण र राष्ट्रिय झण्डाको गौरवलाई सम्मान गर्दै  पौष १ गते राष्ट्रिय धरोहर संरक्षण प्रतिष्ठान नेपालले काठमाडौँको वसन्तपुरमा विशेष कार्यक्रमको आयोजना गर्दैछ ।राष्ट्रिय झण्डा दिवसको अवसरमा वसन्तपुरमा हुने यस कार्यक्रममा नेपाली मौलिकता, स्वाभिमान र राष्ट्रिय एकतालाई उजागर गरिने कार्यक्रम रहेको राष्ट्रिय धरोहर संरक्षण प्रतिष्ठान नेपालका अध्यक्ष राजानन्द माण्डव्यद्वारा जारी प्रेस विज्ञप्तिमा उल्लेख छ l 

राष्ट्रिय धरोहर संरक्षण प्रतिष्ठानका अध्यक्ष राजानन्द माणडव्यकाअनुसार नेपालका ऐतिहासिक, सांस्कृतिक र राष्ट्रिय प्रतीकहरूको संरक्षण र प्रवर्द्धनमा झण्डा दिवसले विशेष योगदान दिनेछ । विगत ६ वर्ष देखि मनाउन थालिएको यो दिवसको सार्थकता र सान्दर्भिकता थपिँदै गएको छ l राष्ट्रिय झण्डाले अन्तराष्ट्रिय पहिचान सहितको मान्यता पाएको हुनाले नेपालको राष्ट्रिय झण्डा आम नेपालीको गर्वको विषय हो l माण्डव्य भन्छन्  l 

नेपाल एकीकरणको २५८ औं वार्षिकोत्सवको अवसरमा आयोजना गरिने यो कार्यक्रमले नेपालको झण्डालाई राष्ट्रिय गर्व र एकताको प्रतीकका रूपमा स्थापित गर्ने उद्देश्य राखेको कुरा राष्ट्रिय धरोहर संरक्षण प्रतिष्ठानको विज्ञप्तिमा जनाइएको छ l 

कार्यक्रममा विभिन्न सांस्कृतिक प्रस्तुतिहरू, झण्डा फहराउने कार्यक्रम, र ऐतिहासिक वक्तव्यहरू रहनेछन्। अध्यक्ष माण्डव्यका अनुसार कार्यक्रममा राष्ट्रिय झण्डाको ऐतिहासिक पृष्ठभूमि, महत्त्व र त्यसले समेटेको नेपाली पहिचानबारे चर्चा गरिने कार्यक्रम तय गरिएको छ ।

कार्यक्रमको विवरण यसप्रकारको रहेको छ :

मिति: २०८१ पुस १ गते, सोमबार

समय: बिहान ८:०० देखि १०:०० बजे

स्थान: बसन्तपुर, काठमाडौं

राष्ट्रिय धरोहर संरक्षण प्रतिष्ठानको विज्ञप्ति जस्ताको त्यस्तै :

यो माटोको सुगन्धमा म राष्ट्रियता पाउँछु ।

मैले लगाउने दौरासुरुवालमा म पहिचान पाउँछु ।

मेरो देशको झण्डा बोक्दा म स्वाभिमान पाउँछु ।

त्यसैले त म आफुलाई नेपाली भन्दा गर्व महसुस गर्छु ।

#जय स्वाभिमान  l