काठमाडौँ -दलित समुदायबाट राज्यका महत्वपूर्ण अङ्गहरूमा तीन जनाले प्रवेश पाएका छन् l दुई जनाको चयन भइसकेको छ भने राजदूतको संसदीय सुनाइ बाँकी रहेको छ l नेपाल प्रहरीमा डिआइजी, राजदूत र जिसस प्रमुख दलित समुदायबाट छनोट गरिएको छ l समावेशीकरण राज्यको चरित्र मान्ने परिपाटीमा यो उल्लेख्य नभए पनि सामान्य प्राप्ति भने मान्न सकिन्छ l 

जिसस प्रमुख 

मङ्सिर ५ गते कैलाली जिससको प्रमुखमा टीकाकुमारी (चौधरी)भुल निर्विरोध भएकी हुन् l नेपाली कांग्रेसबाट निर्वाचित जिसस प्रमुखको मृत्यु भए पछि रिक्त ठाउँमा भएको निर्वाचन प्रकृयामा भुल निर्विरोध भएकी हुन् l  कैलारी गाउँपालिका वडा नम्बर २ को वडा सदस्यमा नेपाली कांग्रेसको तर्फबाट गत स्थानीय निकायको चुनावमा उनी दलित महिला सदस्यको रुपमा वडामा निर्वाचित भएकी थिइन् l उनै भुललाई कांग्रेसले कैलाली जिससको प्रमुखमा उमेद्वार बनाएर विजयी गराएको छ l 

२०७४ को स्थानीय निकायको चुनावमा दलित महिला सदस्यमा पराजित उनी २०७९ मा भने निर्वाचित भएकी हुन् l  टीकाकुमारी चौधरी भुलले प्लसटुसम्म अध्ययन गरेकी छन् l 

राजदूत 

कपिलवस्तु जिल्लाका पूर्ण नेपाली श्रीलंकाको राजदूतमा सिफारिस भएका छन् ।
नेपाल सरकारको बिहीबार बसेको मन्त्रिपरिषद बैठकले कपिलवस्तुका डा.पूर्ण नेपालीलाई श्रीलंकाको राजदूतमा नियुक्तिका लागि सिफारिस गर्ने निर्णय गरेको हो । ‘दलित समुदायबाट प्रतिनिधित्व हुने गरी श्रीलंकाको आवासीय राजदूतमा सिफारिस गरिएको छ,’ नेपाल सरकारका प्रवक्ता पृथ्वी सुब्बा गुरूङले जानकारी गराएका छन् l

 नेपाली बारे संसदीय सुनुवाइ समितिमा सुनुवाइ हुनेछ। समितिबाट नाम अनुमोदन भएपछि राष्ट्रपतिले राजदूत नियुक्त गर्ने व्यवस्था छ । डा.नेपाली हाल काठमाडौं विश्वविद्यालयमा एसोसियट प्रोफेसर हुन् । दलित समुदायबाट यस अघि पदम सुन्दास बहराइन र डा. निर्मल विश्वकर्मा दक्षिण अफ्रिकाको लागि राजदूत भएका थिए l 

प्रहरीक नायव महानिरीक्षक

नेपाल प्रहरीको नायव महानिरीक्षक (डिआईजी) पदमा पहिलो पटक दलित समुदायका व्यक्ति पुगेका छन् । ती व्यक्ति हुन् डिआईजी बढुवा सिफारिसमा परेका प्रहरी बरिष्ठ उपरीक्षक (एसएसपी) डम्बरबहादुर विक । प्रहरी निरीक्षकबाट प्रहरी सेवामा प्रवेश गरेका विकले एसएसपीमा विपद् व्यवस्थापन महाशाखा सामाखुसीको कमाण्ड सम्हाले भने प्रहरी उपरीक्षक (एसपी)मा जिल्ला प्रहरी कार्यालय धादिङ र लुम्बिनी प्रदेश ट्राफिक प्रहरी कार्यालयको सफल कमाण्ड सम्हाले ।

यसैगरी प्रहरी नायब उपरीक्षक (डिएसपी)मा जिल्ला प्रहरी कार्यालय ओखलढुंगा र जिल्ला प्रहरी कार्यालय प्युठानको कमाण्ड सम्हाले भने प्रहरी निरीक्षकमा इलाका, जिल्ला ट्राफिक कार्यालयको कमाण्ड सम्हालेको अनुभव छ । डिआइजी डम्बर विक दाङ जिल्ला निवासी हुन् l