६५ वर्षीय खातीमाथि जातीय विभेद, प्रहरीले जाहेरी दर्ता गर्न मानेन 
झापाको बुद्धशान्ति– १ का ६५ वर्षीय बलबहादुर खातीमाथि जातीय विभेद भएको छ । होक्से खानेपानी तथा सरसफाइ उपभोक्ता समितिका कर्मचारीद्वय ५२ वर्षीय पुष्पलाल घिमिरे र ५५ वर्षका चित्रबहादुर श्रेष्ठले जातीय रूपमा होच्याउँदै विभेद गरेका हुन् ।

बलबहादुरलाई जातीय रूपमा होच्याउने शब्द मात्र प्रयोग गर्दै उनीहरूले सामाजिक सञ्जालमा भिडियो नै राखेका छन् । श्रेष्ठको फेसबुकमा पोस्ट भएको भिडियोमा भनिएको छ, ‘बले कामीलाई आज बिहान देखेँ, आज लोदर लाग्ने भयो ।’ भिडियोमा पुष्पलाल बोलेका छन् । १२ भदौमा फेसबुकमा भिडियो राखिएकामा बलबहादुरले त्यसको भोलिपल्ट मात्र थाहा पाएका थिए । 

‘मेरो घर बाटोकै अगाडि छ । घरको बाटो भएर हिँड्दा मलाई देखेर यसो भनेछन् । म त फेसबुक चलाउदिनँ । फेसबुक चलाउनेले देखेपछि मुद्दा गर्ने कुराकानी भयो,’ उनले भने, ‘त्यसपछि बुद्धशान्ति– १ का वडाध्यक्ष अनिल वाग्लेको उपस्थितिमा गाउँमा नै छलफल राखे । माफी माग्न खोज्दै थिए । मेरो मात्र होइन हाम्रो सिंगो समुदायको बेइज्जती सम्झिएर माफी दिएनौँ । वडाध्यक्षले पनि साधारण कुरा हो माफी दिनु भनेर दबाब दिनुभयो ।’ 

बलबहादुर सोमबार इलाका प्रहरी कार्यालय धुलबारीमा जातीय विभेदविरुद्धको जाहेरी लिएर पुगेका थिए । इलाका प्रहरी कार्यालय धुलाबारीका प्रमुख प्रहरी निरीक्षक कुमार राजवंशी ढिला आएका कारण ७ बजेसम्म पर्खिए । तर, प्रहरीले जाहेरी लिए पनि दर्ता गर्न मानेन । ‘प्रहरीले पहिला मान्छे बोलाउँछौँ । अनि भोलि दर्ता गरौँला भन्यो । प्रहरीले माथिल्लो निकायमा सोध्नुपर्छ पनि भन्यो,’ दलित अधिकारकर्मी सुरेश बराइली भन्छन्, ‘जाहेरी लिएर अनुसन्धान गर्ने कि पहिला मान्छे पक्रिएर जाहेरी दर्ता गर्ने ?दलितले न्याय नपाउने ? वडाध्यक्षले नै आरोपित बुझेर लगेका छन् । यहाँ राजनीतिक दबाब स्पष्ट छ ।’

उनीहरूले दिएको जाहेरी प्रहरीले मंगलबार पनि दर्ता गरेको छैन । ‘हामी जाहेरी दिएर आएका हौँ । आज उपचारका लागि सिलिगुढी जानुपर्ने थियो । म गएँ,’ बलबहादुरले भने, ‘प्रहरी निरीक्षक कुमार राजवंशीले मान्छे ल्याएपछि कता गएको भन्दै उल्टै गाली गरे ।’ जातीय विभेदको जघन्य मुद्दाको आरोपमा पक्राउ गरेर ल्याइएका आरोपित घिमिरे र श्रेष्ठलाई प्रहरीले मंगलबार नै छाडेको छ । उनीहरूलाई वडाध्यक्षको जिम्मा लगाएर छाडिएको इलाका प्रहरी कार्यालय धुलाबारीका प्रमुख प्रहरी निरीक्षक कुमार राजवंशीले बताए । ‘म हिजो जिल्लामा मिटिङमा थिएँ । राति आएपछि जाहेरी हेरेँ । राति त दर्ता हुँदैन नि ! पहिला मान्छे ल्याएर सोधपुछ गर्छौँ अनि जाहेरी दर्ता गरौँ भनेर पठाएको हुँ । पछि उहाँहरू नै आउनुभएन,’ राजवंशीले भने, ‘निवेदक नआएपछि वडाध्यक्षले ल्याउँछु भनेर जिम्मा लिएर जानुभएको छ ।’

बुद्धशान्ति– १ का वडाध्यक्ष अनिल वाग्लेले केही दिनअघि नै माफी मागेर मिलाएको बताए । ‘केही दिनअघि ठुलो उपस्थितिमा हामीले नगर्ने काम गरेको हो भनेर माफी मागेपछि विषय सकिएको थियो । फेरि जाहेरी परेपछि हामी मंगलबार इलाका प्रहरी कार्यालयमा पुगेका थियौँ । जाहेरी दिने मान्छे उपचारका लागि भारत गएको थाहा पाएपछि बुधबार ३ बजे छलफल गर्ने गरी आयौँ,’ उनले भने ।

स्मरणीय : पत्रपत्रिका स्तम्भ अन्तर्गत akabarey.com ले यो सामाग्री नयाँ पत्रिका दैनिकबाट चिरिन्जीवी घिमिरेको सामाग्री साभार गरेको हो l सामग्रीको लागि सम्बद्ध पक्षलाई धन्यवाद l सम्पादक