काठमाडौं, साउन ,१६  -  सरकारले विभिन्न १८ देशमा नयाँ राजदूत सिफारिस गरेको छ ।

सोमबार बसेको मन्त्रिपरिषद बैठकले भारत, अमेरिका, बेलायत, चीन, अष्ट्रेलियालगायत १८ देशमा नयाँ राजदूत सिफारिस गरेको हो ।

 राजदूतमा सिफारिस भएकाहरूको संसदीय सुनुवाइबाट नाम अनुमोदन भएपछि राष्ट्रपतिले नियुक्त गर्ने संवैधानिक व्यवस्था छ । सोमबारकै मन्त्रिपरिषद बैठकले चीन, अष्ट्रेलिया, रुस, दक्षिण अफ्रिका र श्रीलंकामा कार्यरत राजदूतलाई १५ भदौभित्र फर्किसक्ने गरी फिर्ता बोलाएको छ ।

फिर्ता हुनेमा चीनका लागि माओवादीबाट सिफारिस भएका विष्णुपुकार श्रेष्ठ, रुसका लागि मिलन तुलाधर र अष्ट्रेलियाका लागि राजदूत बनेका कैलाशराज पोखरेल छन् ।

 यसैगरी यसअघि श्रीलंकाका लागि राजदूत बनेका बासुदेव मिश्र र दक्षिण अफ्रिकाका लागि राजदूत बनेका दानबहादुर तामाङ पनि फिर्ता हुने भएका छन् ।

  राजदूतमा सिफारिस व्यक्ति र देश 

१‍. डा. शंकरप्रसाद शर्मा – भारत
२. कान्ता रिजाल –अष्ट्रेलिया
३. नरेशबिक्रम ढकाल –साउदी अरेबिया
४. प्रा. कपिलमान श्रेष्ठ – दक्षिण अफ्रिका
५. धनप्रसाद पण्डित – इजरायल
६. रामकृष्ण भट्टराई – श्रीलंका
७. सनिल नेपाल – स्पेन
८. डा. शैल रुपाखेती – जर्मनी
९. लोकदर्शन रेग्मी – अमेरिका
१०. चन्द्रकुमार घिमिरे – संयुक्त अधिराज्य
११. डा. शिवमाया तुम्बाहाङ्फे– दक्षिण कोरिया
१२. जंगबहादुर चौहान – रुस
१३. रमेशचन्द्र पौडेल – कतार
१४. प्रा. डा. कृष्णप्रसाद ओली – चीन
१५. सुम्निमा तुलाधर – डेनमार्क
१६. नेत्रप्रसाद तिमल्सिना – मलेसिया
१७. प्रकाशमणि पोखरेल – पोर्चुगल
१८. रीता धिताल – पाकिस्तान

akabarey.com टिप्पणी : राजदूत सिफारिसमा परेका व्यक्तिहरूको अनुहारले हाम्रो देशले अवलम्बन गरेको समावेशी चरित्रको प्रतिनिधित्व गर्ने प्रणालीको धज्जी उडाएर राज्यको वास्तविक चेहेरा उदाङ्गो पारेको छ l दलित,महिला, जनजाति, मुश्लिम, थारु र सीमान्तकृत समुदायले प्रतिरोध गर्नुको विकल्प छैन l अमुक जाति र समुदायप्रति उदार र अरूप्रति निर्मम सरकारको अनुहार राजदूत सिफारिसले अभिव्यक्त गरेको छ l