काठमाडौँ: अन्तरजातीय विवाह गरी श्रीमानले छोडेकी दलित युवतीलाई विश्वसाइकल यात्री पुष्कर शाहले आर्थिक सहयोग गरेका छन् l अन्तरजातीय बिहेको कहर : तीन महिनासम्म न बच्चाको न्वारान, न भेटिए श्रीमान् भन्ने अकबरे.कमले प्रकाशित गरेको समाचारलाई हेरेर शाहले सहिद लखन गाउँपालिका-१ बक्राङकी मनिका परियारलाई रू दस हजार रुपैया सहयोग पठाएका छन् l मनिकाका श्रीमान् धादिंङका मिलन श्रेष्ठ छोरा जन्मेको तीन महिनासम्म पनि सम्पर्कमा आएका छैनन् l 

भागेर गरेको बिहे हुनाले माइती यसै खुसी छैनन् । ढाँट छल गरी भित्र्याएको हुनाले घर परिवारले गाउँ निकाला गरिसके । जीवन काट्ने भनेको एउटा श्रीमान् पनि गर्भ रहेको थाहा हुने बित्तिकै फरार भए । मनिकाका दिन अहिले रोएरै कट्ने गरेका छन् ।उनले जेठ १० गते गोरखा अस्पतालमा छोरा जन्माएकी थिइन् l

मनिका भन्छिन् :माइती गाउँमा एकजना काकीले एउटा सानो टहरो दिनुभएको छ । त्यहीँ ओत लागेकी छु’, मनिका भन्छिन्, ‘बच्चाको न्वारान नभएकाले माइतीले पनि घरभित्र छिर्न दिँदैनन् । यही सानो घरमा रोएरै दिनरात बिताइरहेकी छु ।’

कमाइ गर्ने कोही छैनन्, आम्दानी शून्य छ । आफ्नो सुत्केरी ज्यान र शिशुलाई पोषण छैन । ‘मेरो दूध आउँदैन । अलिअलि आएको दूध नि बच्चाले खान मान्दैन । दूध किनेर खुवाउनुपर्छ । केले किन्ने ?’, हरेक शब्दमा रुँदै उनी भन्छिन्, ‘खान नपाएर होला, बाबु दिनरात रुन्छ । म सहन नसकेर रुन्छु । आफू त जे जसो गरुँला बच्चालाई खुवाउनै गाह्रो भयो ।’ साँघुरो कोठाभित्र बस्दा गर्मीले बच्चाको ज्यानभरि घमौरा र टाउकामा खटिरा आएको तर बाटो खर्च र उपचार खर्च नहुँदा स्वास्थ्य संस्था पनि जान नसकेको उनको दुःखेसो छ ।

समचारमा आएको यस्तो विवरण पढेपछि पुष्कर शाहले आफूले मनिकलाई केही सहयोग गर्न चाहेको कुरा बताए र अकबरे.कमका प्रतिनिधिले गोरखा घर भएकी अधिकारकर्मी 'एडवान नेपाल'की अध्यक्ष बिन्दु परियार थापासँग सम्पर्क गरी उक्त रकम हस्तान्तरण गर्ने वातावरण मिलाइएको हो l मनिका परियारलाई आज उक्त रकम सहिद लखन गाउँपालिका-१का अध्यक्ष प्रेम गुरुङले हस्तान्तर गरेका हुन् l मनिकाका श्रीमानले दलित भएको कारण आफूलाई छोडेको र हाल अर्की एक चेपाङ युवती लिएर बसेको मनिकाले akabarey.comलाई जानकारी गराएकी छन् l 

स्मरणीय : पुष्कर शाह नेपाल पर्वतारोहण संघको सदस्यमा उप विजेता बने l यदि विजयी भएको भए उनको रकम खानपान र भोज चिया नास्तामा जान्थ्यो सोही रकमको केही अंश उनले समाचारमा आएको कुरालाई ध्यानमा राखे र फजुल खर्च दु:खमा परेको चेलीको लागि राहतमा रूपान्तरण गरेका हुन् l