कविताको खोजी

सहरका नामी कविहरूको जमघटमा

रित्तो गोजी र मगज लिएर पुग्दैछु

थाह छैन के सुनाउनेछु त्यहाँ पुगेर ।

अद्भुत सपना देख्दै थिएँ

कतिखेर उज्यालो बिहान बनेर

फुत्त भागिसकेछ शैशव कविता ।

खेत जोत्दा जोत्दै सुलुलु सुक्खा माटाका डल्लामा

पसिना बनेर बगिसकेछ कविता

भान्सामा चिसो चुल्हो र थाल कचौराहरूसँग

सन्तानका रित्ता पेटहरू द्वन्द्व गर्दै थियो 

बढ्दै गएको भोक बनेर कविता ।

मान्छेको जुलुसभित्र केही कविता

कुर्लिरहेका थिए

विरोधको नारा बनेर l 

केही कविता भिखारीको टिठलाग्दो याचना बनेर

मैतिर दृष्टि फैलाइरहेका थिए 

आधारात सुतेर हिँडिरहेको ज्यापूदाइको

काँधको खर्पनमा क्रमशः

सन्तानको भविष्य र वर्तमान बनेर

कविता हाँसिरहेका थिए l

कहिले बेरोजगार घाम बनेर कविता -

बगरमा लडिरहेको भेटियो

कहिले नयाँ पुस्ताको सपना बनेर कविता -

आकाशमा उडिरहेको देखियो

बटुवाको सुसाइमा कविता गम्दै थियो

वसन्तको हसाइमा ऊ रम्दै थियो ।

सबै सबैतिर असरल्ल थियो

केवल मेरो साथमा आउन मानिरहेको थिएन -

एक लजालु जूनजस्तो कविता ।

त्यसैले,

रित्तो गोजी र मगजमा पुगेको छु l 

सहरका नामी कविहरूको जमघटमा -

मेरो कविताको शीर्षक छ .......। 

                                                   - अदीप्त प्रकाश २१ मार्च २०२४