पोखरा, पुस, ७ 

 शनिबार पोखराको अमरसिंह चोकमा भएको सभामा रवि लामिछानेमाथि मकैको खोया प्रहार भएको छ l  रास्वपा अध्यक्ष रवि लामिछानेले एक/दुईवटा आक्रमण र मुद्दाबाट आफू विचलित नहुने जनाएका छन् ।

खोया प्रहार गर्ने व्यक्ति र उनको परिवारलाई भेट्न आफू जाने सुनाउँदै उनले थपे, ‘न मुद्दा, न मामिला उहाँलाई बुझाइदिनु होला । माला लगाएर घर छाडिदिनू होला । देशको पूर्व उपप्रधान तथा गृहमन्त्री भएकाले यो सुरक्षाकर्मी साथीहरूलाई मेरो अनुरोध र निर्देशन पनि भयो । म उहाँको परिवारलाई भेट्न म छिट्टै जानेछु ।’ 

 उनले प्रहारको बदलामा एउटा फूल रोपेर जाने सुनाए । उनी भन्छन्, ‘मनबाट गल्ती भयो भनेर महसुस हुने गरी काम गरी फेरि यही चोकमा आएर कुरा गर्ने छु ।’ यसलाई जनताले दिएको चेतावनी ठानेको उनले सुनाए । 

 
लामिछानेले आफूले नबिराएको दाबी गर्दै आत्तिनुपर्ने अवस्था नरहेको उल्लेख गरे । ‘हामी आत्तिएका छैनौँ, अघिल्लो सात जन्मको हिसाब निकाले पनि अनियमितता पत्ता लगाउन सक्दैनन् । जति पटक लडिए पनि उडेर हिँड्छु । एक आक्रमण, मुद्दाबाट पछि हट्ने सुविधा मलाई छैन ।’

लामिछानेले खाेया प्रहार गर्ने व्यक्तिका विषयमा कास्कीका प्रहरी प्रमुख एसपी माेहन थापालाई फाेन गरेर जानकारी लिएका थिए । एसपी थापाका अनुसार पक्राउ पर्ने व्यक्ति लमजुङका बासिन्दा हुन् ।

उनी लमजुङको राइनास नगरपालिका वडा नं. ८ का वडाध्यक्ष कृष्ण रानाभाटका आफन्त भएकाे पत्ता लागेकाे थापाले लामिछानेलाई बताए ।

 `श्रीमतीले छाेडेकी हुन् रे । एउटा बच्चा रहेछ । पहिले अटाे ड्राइभर रहेछ । अहिले कुनै काम नगरी आवारा भएर हिँडिरहेकाे छ रे´, उनले सुनाए ।

यसैबीच लामिछानेले नियाेजितरूपमा आफ्नाेविरूद्ध प्रचारवाजी गरिएको भन्दै आक्रोश व्यक्त गरेका छन् । उनले सामाजिक सञ्जालमा स्टाटस लेख्दै कान्तिपुरमा प्रकाशित समाचारप्रति कडा प्रतिक्रिया जनाएका हुन् । खाेया प्रहार गर्नु अगाडि नै समाचार रेडी रहेकाे उनकाे दाबी छ ।