काठमाडौं, कार्तिक, १५ 

नेकपा एमालेले आज दिउँसो पार्टी केन्द्रीय कार्यालय च्यासलमा शुभकामना आदानप्रदान तथा चियापान कार्यक्रम गर्दैछ । एमाले दसैँ, तिहार, छठलगायत पर्वहरूको अवसरमा आज शुभकामना आदानप्रदान तथा चियापान कार्यक्रम गर्न लागेकाे हो  ।

एमाले अध्यक्ष केपी शर्मा ओलीको तर्फबाट दशैं, तिहार, छठ लगायत पर्वहरूको अवसरमा कात्तिक १४ गते शुभकामना तथा आदानप्रदान तथा चियापान कार्यक्रम राखेको थियो ।

उक्त कार्यक्रम संयुक्त राष्ट्रसंघका महासचिव एन्टोनियो गुटेरेसको नेपाल भ्रमणको कार्यतालिकालाई मध्यनजर गर्दै आजको लागि सारिएको थियो । अध्यक्ष केपी शर्मा ओलीले आफ्नो सार्वजनिक पेजबाट पनि  'सबैलाई निम्तो' भन्दै  चियापान कार्यक्रममा उपस्थित हुन आह्वान गरेका छन् ।

 चियापान कार्यक्रम पार्टी केन्द्रीय कार्यालय च्यासलमा दिउँसो ठिक सवा १२ बजेदेखि सुरु हुनेछ। कार्यक्रममा सबै राजनीतिक दलसहित उच्च पदस्थका व्यक्तिहरुलाई आमन्त्रण गरिएको जनाइएको छ ।

नेपाली कांग्रेसका नेता बीपी कोइरालाले २०३३ मा मेलमिलापको नीति लिएर स्वदेश फर्केर आयोजना गरेको चियापान संस्कृति नेकपा एमालेका अध्यक्ष मनमोहन अधिकारीले पनि अनुशरण गरेका थिए l सोही क्रमको निरन्तरतालाई  एमालेले बडादसैँको अवसर पारेर हरेक वर्ष चियापान कार्यक्रम आयोजना गर्दै आएको छ ।