काठमाडौँ, कार्तिक ११

 नेपाली कांग्रेसले आज चियापान एवं शुभकामना आदानप्रदान कार्यक्रम गर्दैछ । चियापानमा दश हजार जनालाई निमन्त्रण गरिएको केन्द्रीय कार्यालयले जानकारी दिएको छ । 
   
वि.सं. २०३३ मा कांग्रेसका संस्थापक नेता बीपी कोइरालाले राष्ट्रिय एकता तथा मेलमिलापको नीति लिइ  स्वदेश फर्केपछि प्रत्येक वर्ष पार्टीले कोजाग्रत पूर्णिमाको दिनमा चियापान समारोह गरी शुभकामना आदान–प्रदान गर्ने परम्परा बसालेको छ । यही परम्परालाई निरन्तरता दिँदै यस वर्ष पनि सभापति शेरबहादुर देउवाले चियापान कार्यक्रम आयोजना गरेको पार्टीका मुख्यसचिव कृष्णप्रसाद पौडेलले जानकारी दिए ।

आज अपरान्ह १ः००-५ः०० बजेसम्म पार्टीको केन्द्रीय कार्यालय बीपी स्मृति भवन बीपी नगर, ललितपुरमा चियापान समारोह तथा शुभकामना आदान प्रदान कार्यक्रम गर्न लागेको हो ।

 कार्यक्रममा विभिन्न राजनीतिक दलका नेता, नेपाल सरकार मन्त्रिपरिषद्का सदस्यहरु, संवैधानिक निकायका प्रमुखहरु, माननीय सांसदहरु, राष्ट्रसेवक कर्मचारीहरु, सुरक्षा निकायका प्रमुखहरु, कुटनीतिक नियोगका प्रमुखहरु, लेखक, साहित्यकार, कलाकार, उद्योगपति एवं व्यवसायीहरू , पेशागत एवं बुद्धिजीवीहरू, नागरिक समाजका अगुवाहरू , मानव अधिकारकर्मीहरू , विभिन्न संञ्चार माध्यमका प्रमुखहरू , पत्रकारहरू  गैर–आवासीय नेपालीहरूको सङ्घ–संस्थाका प्रमुखहरूलगायतका विशिष्ट महानुभावहरू , कांग्रेसका सदस्यहरू  एवं शुभेच्छुकहरूको सहभागिता हुने पनि पार्टीले जारी गरेको विज्ञप्तिमा उल्लेख गरिएको छ ।

 चियापान कार्यक्रमलाई बीपीको निधनपछि, गणेशमान सिंह,कृष्णप्रसाद भट्टराई, गिरिजाप्रसाद कोइराला र सुशील कोइरालाले निरन्तरता दिँदै आएका थिए । सुशील कोइरालाको निधनपछि देउवाले चियापान कार्यक्रमलाई निरन्तरता दिँदै आएका छन् । नेपाली राजनीतिमा चियापान एउटा संस्कृति बनेर परिचित छ l