देशका विभिन्न भागमा स्वास्थ्य सेवा दिंदै हिंडने क्रममा केही दिनदेखि कन्चनपुरको दोधारा चाँदनी अस्पतालमा स्वास्थ्य  शिविर चलाई रहेका डाक्टर गोविन्द केसीले  अनसन बस्ने अल्टिमेटमको दिन आउन एक हप्ता अघि नै फेरि सरकारलाई सचेत गराएका छन् l चिकित्सा शिक्षा आयोगको उपाध्यक्ष छनोटका लागि हाल चिकित्सा शिक्षा ऐनबमोजिमको प्रक्रिया चलिरहेको सन्दर्भमा गलत व्यक्तिको चयन नहोस् र कुनै पनि चलखेल र राजनीतिक तिकडमबाजी नहोस् भन्ने उदेश्यले केसीले आफ्नो पूर्ववत अडानलाई आज प्रेस्  विज्ञप्ति मार्फत दोहोर्याएका छन् l उनको विज्ञप्ति जस्ताको त्यस्तै :

 चिकित्सा शिक्षा आयोगको उपाध्यक्ष छनोटका लागि हाल चिकित्सा शिक्षा ऐनबमोजिमको प्रक्रिया चलिरहेको छ । त्यसै क्रममा अहिलेसम्म सिफारिस समितिले तीन जना व्यक्तिको नाम सिफारिस गरिसकेको हुनुपर्छ । समितिले आयोगको उपाध्यक्ष पदका लागि योग्य उम्मेदवारहरुकै नाम सिफारिस गरेको हाम्रो विश्वास छ ।

तर  सरकारले भने तीन जनामध्ये कुनै एकलाई छान्दा योग्यतम तथा कुनै राजनीतिक प्रभाव, दबाब, प्रलोभन वा स्वार्थको द्वन्द्वमा नपरी आयोगलाई स्वायत्त निकायका रुपमा नेतृत्व गर्न सक्ने व्यक्तिलाई नै छान्नुपर्ने हुन्छ । त्यसका लागि चिकित्सा शिक्षाका क्षेत्रमा कार्यकुशलता प्रमाणित गरेको तथा कुनै पनि स्वार्थ समुहसित कुनै सम्बन्ध नभएको विगतमा कुनै अनियमिततामा नमुछिएको व्यक्तिलाई छान्नुपर्ने हुन्छ । त्यसो नभएमा चिकित्सा शिक्षा आयोगले गत चार वर्षमा स्थापित गरेको साख तथा संस्थागत गरेको सुधार जोखिममा पर्ने हुन्छ ।

त्यसैले कुनै अनुचित प्रभावमा नपरी योग्यतम व्यक्तिलाई चिकित्सा शिक्षा आयोगको उपाध्यक्ष बनाउन सरकारको ध्यानाकर्षण गराउँछौं ।

त्यसो नभएर भोलिका दिनमा आयोगको कार्य सम्पादन प्रभावित भयो भने त्यसले उत्पन्न गर्ने जटिलताका लागि सरकार जिम्मेवार हुनेछ । साथै हामीले विभिन्न मागहरु राखेर यही साउन २९ गतेबाट सत्याग्रह शुरु गर्न लागेकोमा सरकारका तर्फबाट विभिन्न प्रतिबद्धताहरु आएपछि एक महिनाका लागि सत्याग्रह पछि सारेका थियौं ।

ती प्रतिबद्धताहरु कार्यान्वयन नभएमा सही भदौ २९ गतेबाट सत्याग्रह शुरु गर्ने जानकारी पनि गराउँछौं ।

डा. गोविन्द केसी २०८० भदौ २१

akabarey.com परीक्षण प्रसारणमा छ l