असार- श्री सिद्धि गणेश माध्यमिक विद्यालयले आयोजना गरेको दुई दिने शैक्षिक कार्यशाला गोष्ठी सम्पन्न भएको छ । कागेश्वरी मनोहरा नगरपालिकाका नगरप्रमुख उपेन्द्र कार्कीको प्रमुख आतिथ्यमा सम्पन्न भएको उक्त कार्यक्रमको विद्यालय व्यवस्थापन समितिका अध्यक्ष राजकुमार थापाले अध्यक्षता ग्रहण गर्नुभएको थियो ।
विद्यालयको निमित्त प्र.अ. रोशन अधिकारीको स्वागत मन्तव्यपछि सुरु भएको उक्त कार्यक्रममा भागवती माध्यमिक विद्यालय साँखुका प्र.अ. अनुप श्रेष्ठले कसरी सामुदायिक विद्यालयलाई अब्बल बनाउन सकिन्छ भन्ने आफ्नो अनुभवलाई कार्यक्रममा प्रस्तुत गर्नुभएको थियो । आनन्द भैरव माध्यमिक विद्यालयकी प्र.अ. सरस्वती कार्कीले आफ्नो विद्यालयमा गरिएको असल अभ्यासहरूको विषयमा बताउनुभएको थियो । शिक्षा पत्रकार प्रकृति अधिकारीले देशभरिका सामुदायिक विद्यालयमा भएका असल अभ्यासहरू सुनाउनु भएको थियो ।
" कक्षा कोठाभित्रको शिक्षण विधि कसरी प्रभावकारी बनाउन सकिन्छ" भन्ने सम्बन्धमा शिक्षा मन्त्रालयका अधिकृत उषा लामिछानेले आफ्नो प्रस्तुतीकरण प्रस्तुत गर्नुभएको थियो ।

डाक्टर ध्रुव आचार्यले "नेतृत्व विकास" शीर्षकमा दिनुभएको प्रस्तुतीकरण शिक्षकको नेतृत्व विकास, प्रशासकको नेतृत्व विकास के कसरी गर्न सकिन्छ भन्ने कुरा निहित थियो । कागेश्वरी मनोहरा नगरपालिकाका शिक्षा शाखा प्रमुख पुष्पराज ढकालले पालिकाले शैक्षिक सुधारमा गरेको प्रयत्न खरब प्राप्त उपलब्धिको स्मरण गर्दै पहिलो दिनको कार्यक्रमको समीक्षा गर्नुभएको थियो ।
शिक्षक कस्तो हुनुपर्दछ ? भन्ने विषयमा आफ्ना भनाइहरू राख्दै शिक्षा पत्रकार रोशना सुब्बाले दोस्रो दिनको पहिलो सेसन सञ्चालन गर्नु भएको थियो । शिक्षाविद् डा. विद्यानाथ कोइराला र डा. रूपा मुनाकर्मीले " सिद्धान्तलाई कसरी व्यवहारमा लागू गर्न सकिन्छ" भन्ने विषयमा आफ्नो प्रस्तुतीकरण गर्नुभएको थियो । कार्यक्रमको सभा अध्यक्ष राजकुमार थापाले विद्यालयको इतिहासदेखि वर्तमानसम्मको अवस्थालाई सम्झँदै आफ्नो मन्तव्य राख्नु भएको थियो । कागेश्वरी मनोहरा नगरपालिका वडा नम्बर १ का वडाध्यक्ष मुकुन्द प्रसाद गजुरेलले विद्यालयले प्राप्त गरेको ऐतिहासिक सफलतामा विद्यालय परिवारलाई बधाई ज्ञापन गर्नुभएको थियो । कार्यक्रमका प्रमुख अतिथि नगर प्रमुख उपेन्द्र कार्कीले पछिल्लो तीन वर्षमा कागेश्वरी मनोहरा नगरपालिकाका सामुदायिक विद्यालयमा भएको उल्लेखनीय सुधारलाई स्मरण गर्दै सिद्धि गणेश माध्यमिक विद्यालय शिक्षाको हब बनेको र पालिकाले प्राप्त गरेको नतिजाका आधारमा आफू शिक्षा क्षेत्रमा थप लगानी गर्न हौसिएको कुरा बताउनु भएको थियो ।
उक्त कार्यक्रममा श्री सिद्धि गणेश माध्यमिक विद्यालयका शिक्षकहरूसहित कागेश्वरी मनोहरा भित्रका विभिन्न वडाका वडा प्रतिनिधि, पत्रकार, यस विद्यालयका विद्यालय व्यवस्थापन समितिका सदस्य, सल्लाहकार समिति सदस्य, छिमेकी विद्यालयका विद्यालय व्यवस्थापन समितिका अध्यक्ष, छिमेकी विद्यालयका प्रधानाध्यापकलगायत लब्धप्रतिष्ठित व्यक्तित्वहरूको उपस्थिति रहेको थियो ।