काठमाडौँ:पूर्वकानूनमन्त्री शेरबहादुर तामाङ र कोसी प्रदेशका पूर्वसामाजिक विकासमन्त्री उषाकल राईको संरक्षकत्वमा छिरिङ ग्याल्बु लामाको संयोजकत्वमा ३७ सदस्यीय राष्ट्रियस्तरको ‘नेपाली कोदोको रक्सी संरक्षण तथा व्यवस्थापन समिति’ गठन भएको छ l 

समितिले कोदोको रक्सी संरक्षणको लागि राज्यले तत्काल नीति निर्माण गर्नुपर्ने र तत्कालका लागि कोदोबाट बनेको रक्सीलाई नोक्सान नगर्न अनुरोध गरेको छ । समितिले कोदोको रक्सी निर्यात तथा बजार व्यवस्थापनको सुनिश्चितता गर्नुपर्ने, रक्सी उत्पादन तथा गुणस्तर मापनका लागि वैज्ञानिक विधि अपनाउनेलगायत विभिन्न माग अघि सारेको छ ।  
बुधबार रिपोर्टर्स क्लब नेपालमा पत्रकार सम्मेलन गर्दै समितिले आउँदो आर्थिक वर्षबाट नै कानुन बनाई कार्यान्वयन गरिनुपर्ने माग राखेको हो । हाल कोदो र मर्चाको प्रयोग गरी परम्परागत तरिकाबाट बनाइएको रक्सीको बिक्री वितरणमा रोक नलगाउनसमेत समितिले अपिल गरेका छ । बरु, अन्य अखाद्य बस्तुहरूको मिसावटबाट बनेका रक्सीहरूलाई तत्काल अनुगमन गरी कारबाही गर्न सुझाव दिएको छ ।

कोदोको रक्सीको लागि कम्पनी तथा उद्योग स्थापना गर्नलाई तत्काल सहुलियत ऋणको व्यवस्था मिलाउन पनि सरकारसमक्ष माग गरेको छ । 

 कार्यक्रममा बोल्दै समितिका प्रमुख संरक्षक शेरबहादुर तामाङले आफ्नो देशको उत्पादनलाई चिन्नको लागि ढिलाइ भएको भन्दै गुनासो पोखे । उनले नेपाल देश धनी भए पनि आफ्नो उत्पादनमा गर्व गर्न नसक्दा गरिब बन्नुपरेको टिप्पणी गरेका थिए ।

पूर्वमन्त्री तामाङ गाँजा खेतीलाई वैधानिकता दिने विषयमा पनि लविङ गर्दै आएका नेता हुन् l