सुशील ओखेडा-(नयाँ दिल्ली, भारत) - सुदूरपश्चिम प्रदेश, बझाङ जिल्लाको बित्थडचिर गाउँपालिकामा विगत दुई वर्षदेखि सामाजिक कार्यमा सक्रिय ज्वलन्त स्मृति क्लबले भारतको नयाँ दिल्लीमा आफ्नो उप-समिति गठन गरेको छ ।

बित्थडचिर गाउँपालिकामा स्थायी बसोबास गर्ने र हाल रोजगारीको सिलसिलामा नयाँ दिल्लीमा रहेका बुद्धिजीवी, राजनीतिज्ञ, युवा र समाजसेवीहरूको सरसल्लाहमा यो उप-समिति स्थापना गरिएको हो ।

उक्त समिति बित्थडचिर गाउँपालिका वडा नं. ७ का दसवर्षे जनयुद्धमा सहिद हुनुभएका स्व. धर्म वि.क. (पर्चलित नाम: ज्वलन्त) को स्मृतिमा गठन गरिएको छ । क्लबले गणतन्त्र, महिला, दलित, जनजाति, पिछडिएको वर्ग र परिवर्तनका लागि कार्य गर्ने उद्देश्य राखेको छ ।

बित्थडचिरमा यसले खेलाडी उत्पादन, जेहेन्दार विद्यार्थीलाई प्रोत्साहन, वृद्धवृद्धा, बुद्धिजीवी र महिलालाई सम्मान, टुहुरा बालबालिकालाई सहयोगलगायतका सामाजिक कार्य गर्दै समाजमा उदाहरणीय भूमिका निर्वाह गरेको छ ।

अङ्ग्रेजी मिति २०२५ मार्च २३ (चैत १०, २०८१) का दिन नयाँ दिल्लीको कनाट प्लेसस्थित सेन्ट्रल पार्कमा आयोजित बैठकमा ३० जनाको उपस्थितिमा उप-समिति गठन गरिएको हो । समाजसेवी गोविन्द वि.क.को अध्यक्षतामा बसेको उक्त बैठकले बित्थडचिर गाउँपालिकाका वडा नं. १ देखि ९ सम्मका प्रतिनिधित्व हुने गरी सर्वसम्मत रूपमा संचालन समिति र सल्लाहकार समिति चयन गरेको छ ।

संचालन समितिमा अध्यक्ष रमेश पहरी, उपाध्यक्ष दीपक वि.क., वरिष्ठ उपाध्यक्ष शङ्कर वि.क., सचिव प्रकाश वि.क., सहसचिव सुशील ओखेडा, कोषाध्यक्ष पूजा ओखेडा र सदस्यहरू वकिल ओखेडा, दीपक ओखेडा तथा सागर वि.क. रहनुभएको छ। त्यस्तै, सल्लाहकार समितिमा प्रमुख सल्लाहकार गोविन्द वि.क., वरिष्ठ सल्लाहकार धनसिंह खडायत र सल्लाहकारहरू जैदन वि.क., राहुल वि.क., अर्जुन वि.क., नरेश ओखेडा र शेरसिंह वि.क. चयन हुनुभएको छ ।

बैठकमा उपस्थित बुद्धिजीवी, नेतागण र समाजसेवीहरूले चयनित संचालन समिति र सल्लाहकार समितिका पदाधिकारीहरूलाई टीका र दोसल्लाले सम्मान गर्दै बधाई दिएका थिए । कार्यक्रमको अन्त्यमा प्रमुख सल्लाहकार गोविन्द वि.क.ले आफ्नो मन्तव्य राख्दै बैठकको समापन गर्नुभएको थियो ।

ज्वलन्त स्मृति क्लब प्रवास दिल्लीका सहसचिव सुशील ओखेडाले यो जानकारी दिँदै उप-समितिले दिल्लीमा रहेका बित्थडचिरवासीको हितमा काम गर्ने र गाउँपालिकामा क्लबको उद्देश्यलाई थप सशक्त बनाउने बताउनुभयो। यो कदमले प्रवासमा रहेका नेपाली समुदायबीच एकता र सामाजिक कार्यमा योगदान पुर्‍याउने अपेक्षा गरिएको छ ।