शनिवार- सुदूरपश्चिम प्रदेशको अस्थायी राजधानी धनगढीमा आयोजित गोलमेच सम्मेलन सम्बन्धी अन्तरक्रिया कार्यक्रम्मा बोल्दै पूर्वराजदूत डा.निर्मल विश्वकर्माले प्रथम राष्ट्रिय दलित गोलमेच सम्मेलन दलित एकताका लागि  आयोजना गरिएको बताएका छन । गोलमेच सम्मेलनका संयोजक डा. निर्मल विश्वकर्माले दलितहरु एकजुट नभएकै कारण अहिले सम्म मुक्ति हुन नसकेकोले पहिलो पटक आयोजना गर्न लागिएको गोलमेच सम्मेलनले नेपालको दलित आन्दोलनमा नयाँ कोर्स सुरु गर्ने बताए ।

हामी सबै पीडामा छौ, पीडामा मलम लगाउने हो भने दलितका सवालमा हामी सबै एक ठाउमा आउन जरुरी छ उनले भने । सत्ता र शक्तिमा नभएकै कारण दलित समुदायले अझै हत्या, हिंसा र जातीय विभेदको शिकार हुनु परेको बताउदै डा.निर्मल विश्वकर्माले गोलमेच सम्मेलन दलित समुदायलाई सत्ता र शक्ति आर्जन गर्ने माध्यम बन्ने तर्क गरे । एक पटक सबैले पार्टीगत स्वार्थभन्दा माथि उठेर सम्पूर्ण दलित समुदायका हितका लागि  आवाज बुलन्द गर्नु पर्ने बताउदै उनले शक्ति निर्माण गर्न एकताको आवश्यकता भएको बताए । हाम्रा समस्याहरू ज्युँका त्यूँ छन् । दलित समुदाय अरूलाई सत्तामा पुर्याउने भर्याङ्ग मात्र बन्दै गएको छ उनले भने । अब एक पटक दलित समुदायलाई सत्तामा पुर्याउन जरुरी छ । शक्ति के हो भनेर देखाउन जरुरी छ । त्यसैगरी साहित्यकार तथा लेखक सरोज दिलु विश्वकर्माले समुदायका आवाजहरूलाई समेटेर गोलमेच सम्मेलनका लागि विषयबस्तु तयार गरिने बताए ।

सम्मेलनका लागि सबैसँग सहकार्य सहयोग र छलफल सुरु गरिएको बताए । राजनैतिक दलका नेताहरू समुदायका, मन्त्री सांसद र बुद्धीजिवीहरूसँग छलफल गरिने उनले बताए । दलित समुदायले भोग्दै आएको पीडाको अन्त्य ऐतिहासिक गोलमेच सम्मेलनबाट गरिने उनले जानकारी गराए । त्यसैगरी राष्ट्रिय दलित गोलमेच सम्मेलनकाप्रवक्ता अग्नि शिखाले गोलमेच सम्मेलन सम्बन्धी अन्तरक्रिया कार्यक्रमको सुरुवात सूदूरपश्चिम प्रदेशको धनगढीबाट सुरु गरिएको बताए । उनले चैत्र ३ गते कर्णाली प्रदेशको सुर्खेत र ४ गते लुम्बीनी प्रदेशको नेपालगञ्जमा अन्तरक्रिया कार्यक्रमको आयोजना गरिने जानकारी पनि उक्त अवसरमा दिएका छन् l   बैशाखमा काठमाण्डौमा गोलमेच सम्मेलनको तयारीको लागि  सबै प्रदेशमा अन्तरक्रिया गरेर मिति तय गर्ने जानकारी गराए । देशभरीका दलित समुदायका अभियन्ताहरूको काठमाडौंमा बसेको संयुक्त बैठकले वैशाखमा राष्ट्रिय दलित गोलमेच सम्मेलन गर्ने निर्णय गरेको जानकारी गराउदै गोलमेच सम्मेलनका प्रवक्ता अग्निशिखाले गोलमेच सम्मेलनको आवश्यकता र वर्तमान राज्य सत्ताको चरित्र र दलित, दलित समुदाय भित्रको विभेद सम्बन्धी जानकारी गराएका थिए । कार्यक्रम्मा गोलमेच सम्मेलनले अन्तराष्ट्रिय र राष्ट्रिय सिकाइ, गोलमेच सम्मेलनको आवश्यकता, गोलमेच सम्मेलन तयारीको पृष्ठभूमि, गोलमेच सम्मेलनको व्यवस्थापन, गोलमेच सम्मेलनको विधि र भावी योजना बारे पनि छलफल गरिएको थियो ।

सम्मेलन मार्फत वर्तमान अन्तर्राष्ट्रिय परिवेश, दलित समुदायको पहिचान र इतिहास, दलित समुदायका सन्दर्भमा सामाजिक विभेदको विश्लेषण, राज्य सत्ता, राजनीतिक पार्टी र शासकहरूमा नीति, नियत र व्यवहार विश्लेषण, दलित मुक्तिको दर्शन र सिद्धान्तः समाजवाद, दलित मुक्तिको सवाल राजनीतिक हो कि सामाजिक हो कि ? धार्मिक ? दलित समुदायको पहिचान, दलित शब्द राख्ने कि नराख्ने लगायतका विषयमा साझा एजेन्डा विकास गरिने जानकारी गराईएको छ  ।

कार्यक्रम्मा मिसन अम्वेडकर नेपालका अध्यक्ष मनोज जैगडी,दलितका लागि दलित अभियानका सुदूरपश्चिम संयोजक सुरत भूल,नेपाल परिवार दलका सुदूरपश्चिम संयोजक खड्क नागरी,राजनितिक दलका दलित प्रतिनिधि ,वडा अध्यक्ष, दलित पत्रकार संघका केन्द्रीय सचिव धिरज सिंह प्रपाला लगायतका ब्यक्तिहरूले दलित समुदायले भोग्दै आएका समस्या र समाधानका लागि गर्नु पर्ने कामका विषयमा आआफ्ना विचारहरू राखेका थिए ।कैलास आउजीको सभापतित्वमा सम्पन्न अन्तरक्रिया  कार्यक्रमबाट सुरत भुलको संयोजकत्वमा राष्ट्रिय दलित गोलमेच सम्मेलन सुदूर पश्चिम प्रदेश समन्व समिति गठन गरिएको दलितका लागि दलित अभियान केन्द्रीय समिति भारतका सदस्य सुसिल ओखेडाले जानकारी दिएका छन् l