अद्वैतमार्गी योगी सन्त पाइलट बाबाको ८६ वर्षको उमेरमा निधन भएको छ । मधुमेहबाट प्रताडित उनको उपचारक्रममा भारतको मुम्बईस्थित कोकिलाबेन अस्पतालमा मंगलबार दिउँसो निधन भएको हो । पाइलट बाबा भारतको विहार राज्‍यको सासाराम भन्‍ने स्थानमा सन् १९३८मा जन्मिएका व्यक्ति हुन्  । पाइलट बाबाको वास्तविक नाम कपिल सिंह हो । सन् १९५७ मा उनले एक लडाकू विमान सैनिक सेवामा प्रवेश गरेका थिए । उनले १९६२, १९६५ र १९७१ मा बहादुरीपूर्वक चीन, पाकिस्तानको युद्धमा भाग लिएका थिए ।  उनले भारत सरकारबाट वीर चक्र, विशिष्ट सेवा मेडल, कम उचाइमा लडाकू जहाज उडाएर कीर्तिमान राखेका थिए ।

उनले बीएचयूबाट जैविक रसायन विज्ञानमा स्नातकोत्तर गरेका थिए । उनले १५ वर्षसम्म भारतीय विमान सैनिकको रुपमा काम गरी विङ कमाण्ड सम्हालेर अवकाश लिएका थिए ।

कपिल सिंह कसरी पाइलट बाबामा रूपान्तरित भए ?

लडाकू विमान सैनिक सेवामा प्रवेश गरेका र विमान चलाएकाको कारण उनी स्वत: पाइलट नामले बोलाइने भए नै l तर उनी बाबा बन्नुका कारण बारे उनको खुलासा यस्तो थियो :पाइलट बाबाले आफ्नो विभिन्न अन्तर्वार्तामा भन्‍ने गर्थे, कि ‘जब कुनै अप्रिय घटना हुन लागेको हुन्थ्यो तब एक वृद्ध र पातलो बाबा आएर उक्त घटनाको बारेमा बताइदिनुहुन्थ्यो। उक्त घटनाबाट बच्ने उपाय पनि भनिदिनुहुन्थ्यो। सन् १९६२ मा युद्धको समयमा एक अद्‌भुत घटना घट्यो जसले मेरो जीवनमा पूरै परिवर्तन ल्याइदियो। युद्धको समयमा मैले नभनेको सैनिकलाई युद्धमा पठाउँदा भारतले क्षति बेहोर्नु परेको थियो । एक समय युद्धको बेला सैनिक विमान उडाइरहेका बेला मेरो मूल टावरसँग सम्पर्क टुट्यो।

मेरो हातमा विमान कन्ट्रोल थिएन। त्यही समय फेरि उही बाबा आएर मलाई विमानबाट सुरक्षित अवरतण गराउनुभयो। यो कसरी सम्भव भयो म आफैं अचम्मित भएँ र त्यसपछि लाग्यो विज्ञानभन्दा माथि पनि अरू कसैले सत्ता चलाइरहेको छ। त्यसपछि मैले सैनिक सेवाबाट अवकाश लिएर हिमालयको यात्रा तय गरें। यात्रामा अनेकन् दु:ख कष्ट भोगें र मेरो सपनामा आउने बाबासँग भेट भयो जसको नाम थियो हरि बाबा। मैले उहाँलाई नै आफ्नो गुरु मानें र गुूसँग योगीको यात्रामा पाइला चालें ।’

उनले हिमालयमा बसेर नेपालमा तपस्या गरे । सत्य एवम् स्वयंको खोजका लागि भौंतारिंदै हिंडेको क्रममा उनले मकवानपुर जिल्लाको भैंसेनिकट त्रिखण्डी महादेवमा गुरु भेट्टाए। त्रिखण्डी उनको गुरुस्थली हो।भारतमा सन्यासीहरूको सबैभन्दा ठूलो जुना अखडाका महामण्डलेश्वर पाइलट बाबाले मकवानपुरको त्रिखण्डीमा नेपाली गुरु हरि गिरि महाराजसँग दीक्षा लिएका थिए ।

संन्यास दीक्षा उपरान्त उनले नेपाल र भारतका उच्च हिमाली भागमा अनेकौं वर्ष कठिन तप गरे। साधना सम्पन्न भएपछि उनले भारत भ्रमण गरेर योग, ध्यान, धर्म, अध्यात्मको अलख जगाए। भूमिगत समाधि, जल समाधि, ‘एयर टाइट ग्लास’ समाधिका साथै अनेकौं स्थानमा दश महाविद्या यज्ञ आयोजित गरेर उनले सनातन हिन्दू धर्मको यश र कीर्ति स्थापित गर्नुका साथै लाखौं मानिसलाई सद्‌मार्गमा ल्याए। 

नेपालमा विख्यात सन्त एवम् गुरुका रूपमा स्थापित पाइलट बाबा उज्जैन पीठाधीश्वर समेत रहेका थिए ।  भारतमा झण्डै २ करोड ८० लाख साधु सन्त छन्। यी साधु सन्त विभिन्न १३ वटा अखाडासँग आबद्ध छन्।

संख्या, प्रसिद्धि एवम् विस्तारका दृष्टिकोणले जूना अखाडा सबैभन्दा ठूलो र प्रभावशाली छ। यसै अखाडाका वरिष्ठतम महामण्डलेश्वर श्री १००८ सोमनाथ गिरी पनि पाइलट बाबाको अर्को परिचय हो l हाल महायोगी पाइलट बाबाका नामले विख्यात छन्।

नैनीताल, हरिद्वार, सासाराम, उत्तरकाशी, गंगोत्री, ऋषिकेश (रायवाला) मा पाइलट बाबाका आश्रम छन्। उनले आफ्नो गुरुस्थली त्रिखण्डीमा पनि आश्रम बनाउन सुरु गरेका थिए तर कोरोनाकालले गर्दा आश्रम निर्माणमा व्यवधान आयो। त्रिखण्डीमा निर्माणाधीन आश्रमलाई द्रुत गतिले सम्पन्न गराउन उनी १ वर्ष पहिले वैशाख १६ गते नेपाल आएका थिए । नेपालको हिमालय क्षेत्रमा साधना गरेका उनले भक्तपुरको सूर्यविनायकमा रहेको जंगलमा पाइलट बाबा आश्रम बनाएर बसेका थिए ।

विभिन्न न्युज एजेन्सीहरूको सहयोगमा तयार पारिएको सामग्री र तस्बिर