वैशाख २८, २०८१ 

आज वैशाख शुक्ल तृतीया अर्थात् अक्षय तृतीयाको दिन आज विशेष दिनको रूपमा नेपालमा मानिन्छ l  हिन्दू सम्प्रदायमा जौँको सातु र सर्वत खाएर यो पर्व मनाउने गरिन्छ । आज विष्णु र लक्ष्मीको पूजा गर्नुका साथै सातु र सर्वत दान गरेमा शुभ फल मिल्ने धार्मिक विश्वास छ । त्यसैले सातु सर्वत् दान गर्ने र  प्रसादको रूपमा सेवन गर्ने चलन छ l  

 विभिन्न धर्मशास्त्र अनुसार आजको दिनलाई स्मरण गर्ने विभिन्न मान्यताहरू छन् :  वैशाख तृतीयाकै दिनदेखि त्रेता युगको सुरुवात भएको तथा यही दिन भगवान् परशुरामको जन्म भएको मानिन्छ । त्यसैले आजको दिनलाई परशुराम जयन्तीको रूपमा पनि मनाइन्छ । यही दिन शिव–पार्वतीको विवाह भएको पनि मानिन्छ । त्यसैले आज  गरेको स्नान, दान र शुभ कर्मको विशेष महत्व छ । 

 यसैबीच, मधेसका महोत्तरीसहितका प्राचीन मिथिला क्षेत्रमा पनि यो पर्व मनाइँदै छ । ब्राह्मणलाई जौँ, चनाको सातु र सक्खरको सर्वत दान गरेर मिथिलावासीले यी पदार्थ आफूले पनि सेवन गर्ने परम्परा छ ।पर्वमा जति बढी भोका र तिर्खाएका व्यक्तिलाई सातु र सर्वत खुवाइन्छ, त्यति नै बढी पुण्य पाइने हिन्दू विश्वासले आज हिन्दू मैथिल बाटोमा बसेर सातु र सर्वत बटुवालाई खुवाउँछन् ।

 आज सुन, शीतल खाद्य परिकार र वस्त्र दान गर्नेको कहिल्यै भण्डार खाली नहुने शास्त्रमा वर्णन भएको कथन सुनाउने सुन्ने गरिन्छ l