बैतडीको पेट्रोल पम्पमा पेट्रोल पाइदैन तर स्थानीय बजारमा भने छ्याप-छ्याप्ती पाइन्छ। बढी मूल्य लिएर अवैध रुपमा पेट्रोल तथा डिजेल बिक्री हुँदै आएको छ। पेट्रोल पम्प बाहेक पसलहरुमा ड्रम तथा बोतलमा राखेर पेट्रोल र डिजेल बिक्री हुँदै आएको हो।

तराईबाट ड्रममा डिजेल तथा पेट्रोल ल्याएर खुला रुपमा बढी मूल्यमा बिक्री गर्ने गरिएको स्थानीयहरुले बताएका छन्। पेट्रोलियम पदार्थको खुला रुपमा बिक्री वितरण भइरहेको भए पनि नियमन गर्ने निकायले ध्यान नदिएको गुनासो बढ्दै गएको छ। जिल्लामा एक सय बढी व्यापारीले यसरी नियम विपरीत अवैध रुपमा डिजेल र पेट्रोलको कारोबार गर्दै आइरहेका छन्।

बैतडीको सतबाँझमा एउटा मात्रै भण्डारी आयल स्टोर रहेपनि व्यापारीहरूले अवैध रूपमा डिजेलपेट्रोलको पदार्थको कारोबार गर्दै आएका हुन्। जिल्ला सदरमुकाम गोठालापानी, देहिमाण्डौं, पाटन, खोड्पे, गोकुलेश्वर, खोचलेक लगायतका बजारमा दर्जनौं व्यापारीले खुला रूपमा पेट्रोलियम पदार्थको बिक्रीवितरण गर्दै आएको स्थानीयले बताएका छन्।