काठमाडौँ, ८माघ-दलितका लागि दलित अभियानका प्रमुख खगेन्द्र सुनारले रिपोर्ट्सक्लब भृकुटीमण्डपमा एक प्रेस मिट गरेर नयाँ चरणको आन्दोलन छिटै घोषणा हुने जानकारी दिएका छन् l

माइतीघर मण्डलामा हातखुट्टामा नेल लगाएर धर्ना दिएर सडक सङ्घर्ष मार्फत 'दलितलाई खै' को ब्यानरमा ४५ दिनको दिन असोज ३ गते संविधान दिवसमा भव्य कार्यक्रम गरेर दलित जागरणको इतिहासमा सबैभन्दा धेरै मान्छे काठमाडौँ बोलाएर रेकर्ड बनाएका सुनारले अब अर्को चरणको आन्दोलनको घोषणा गर्ने र २०८२ असोज ३ गते संविधान दिवसको दिन वार कि पारको लडाई हुने कुरा बताएका छन् l अबको आन्दोलन निर्वाचन आयोग घेर्नेदेखि सिंहदरबार हुँदै राष्ट्रपति भवन शितल निवाससम्म नेल लगाएर नै पुग्ने उद्घोष गरेका छन् l 

अहिले एक सुत्रीय माग संविधान प्रदत्त दलितको हक सुनिश्चित गर भन्ने नै हो l सुनारले भने l 

१४ प्रतिशत दलितको हक र अधिकारको सुनिश्चितताको माग राखेर सातै प्रदेशका मुख्यमन्त्रीको कार्यालयमा धर्ना दिने र आफ्नो माग सुनाउने घोषणा पनि सुनारले उक्त पत्रकार सम्मेलनमा जानकारी दिएका छन् l भर्खरै गठित भूमि आयोगमा दलितको प्रतिनिधित्व शून्य भएको स्थितिले सरकार अझै दलितलाई हेप्ने चेप्ने र अवसरबाट वन्चित गर्ने नियत राखेर प्रस्तुत भएको देखिन्छ l 

पार्टीमा लागेका दलितहरूप्रति आक्रोशित हुँदै सुनारले भने: 'हामी नेल बोकेर सडकमा छौं तर पार्टीमा लागेका दलित नेताहरूतेल बोकेर नेताको खुट्टा मोल्न अभ्यस्त छन् l दलितलाई दलित नै बनाइ राख्ने प्रपन्चमा सहयोगी बनेर बसेका छन् l दलितहरू जो जो जुन जुन निकायमा प्रतिनिधित्व गरेका छन् तिनीहरू दलित भएको कारण भएका हुन् l दलित भएको दलितको पीर र मुद्दा भएको कारण उनीहरू कोटाबाट त्यहाँ पुगेका हुन् l त्यसैले उनीहरूको प्रथम  दायित्व दलितप्रति हुनुपर्छ l पार्टीहरूका दलित सङ्गठन गुलामहरूको सङ्गठन हो l त्यहाँ दलितका नेताहरू तेल बोकेर हिंडेका छन् l आफ्ना नेताको खुट्टामा लाउ कि हातमा लाउ कि ढाडमा लाउँ भनेर तेल बोकेर बसेका छन् l यो तेल लगाउने अभियान धेरै टिक्दैन l दलितहरू अपहरित भएर पार्टी भित्र बसेका छन् l अब उनीहरूले मुख खोल्नु पर्छ l पार्टीमा लागेका दलितहरूले अब बोलाएर मलामी त आउँदैनन् आन्दोलनको लागि को आउला र ? त्यसैले आन्दोलन हामी गर्छौ सबैको न्यायको लागि आन्दोलन हुन्छ l दलितलाई खै त्यही आन्दोलनको श्लोगन हो l'

अब हामी सडकमा आउँदै छौं l महत्वपूर्ण सरकारी अड्डाको गेटदेखि उच्च पदस्तको बेडसम्म दलितलाई खै भन्दै  प्रश्न गर्न आउने छौं l 

घडी भन्दा बढी हत्कडी लाएर आएका मान्छे हौ जस्तो मुद्दा र राज्यको दमन पनि खप्न तयार छौं l अब हरेक गाउँ र बस्तीमा दलितलाई खै भनेर हामी पुग्छौ l हाम्रा साथीहरू पुग्छन् l हामी अब झन् मजबुत र परिमार्जित भएर आउने छौं l हामी बन्दुक लिएर सिंह दरबार पस्न पनि तयार छौं र त्यसका लागि आजीवन जेल बस्न पनि तयार छौ l सुनारले भने l